12emîn Festîvala Fîlman a Duhokê 9 mehê dest pê dike

PeyamaKurd- Amadekarîyên ji bo 12emîn Festîvala Fîlman a Navneteweyî ya Duhokê dest pê kirin ku biryar e roja 9ê vê mehê were lidarxistin û heşt rojan bidome.

Di festîvala îsal de, ji 800 fîlmên ku hatine pêşkêşkirin, komîteya wergirtina fîlman 110 fîlm ji bo tevlîbûnê hilbijartine. Ji vê hejmarê jî 45 fîlm berhemên navxweyî û Kurdî ne û 65 fîlm jî berhemên biyanî ne, ku ji 37 welatên cuda ne.

Endamê Komîteya Wergirtina Fîlman Adil Ebdirehman ragihand: “Ew 45 fîlmên Kurdî li gorî fîlmên dirêj, kurtefîlm û belgefîlman hatine vavartin, ku hin ji wan dê ji bo pêşbirkê û hin jî tenê dê ji bo nîşandanê bin.”

Adil Ebdirehman diyar kir, pîverê qebûlkirina fîlmên Kurdî girêdayî zimanê fîlm, cihê kişandinê, nasnameya derhêner an jî naveroka çîrokê ye, ku girêdayî Kurdan be.

Mijara sereke ya vê festîvalê ji bo îsal "Hişkesalî û Guhertinên Keşûhewayê" ye. Ji ragihandina Hesen Arif ragihand ku, ev mijar hatiye hilbijartin ji ber ku bûye diyardeyeke cîhanî û Hikûmeta Herêma Kurdistanê jî girîngiyeke mezin dide wê.

Îsal welatê Spanyayê dê wekî welatê mêvan bi 13 fîlman tevlî vê festîvalê dibe. Zêdetirî 100 ciwanên xwebexş di birêvebirina karûbaran de pişkdar in û sê cihên sereke li navenda bajarê Duhokê ji bo nîşandana fîlman û lidarxistina panelan hatine destnîşankirin.

Rêxistinkerên vê festîvalê jî di danûstandinan de ne ku, stêrkeka sînemayî (Erebî, Tirkî an Farisî) vexwînin, lê hîn biryara dawiyê di wî warî de nehatiye dayîn.