Barrack: Diyaloga Îsraîl û Sûriyeyê dikare hevsengiyên herêmî biguherîne

PeyamaKurd – Nûnerê Taybet ê Amerîkayê Tom Barrack, danûstandinên di navbera Îsraîl û Sûriyeyê de yên bi navbeynkariya Washingtonê wekî "pêşkeftineke dîrokî" bi nav kir. Barrack diyar kir ku ev diyalog piştî bi dehsalan "xaleke werçerxê ya dîplomatîk" e û dikare bandoreke mezin li ser aramiya Rojhilata Navîn bike.

Li gorî agahiyên ku Barrack parve kirine, piştî hevdîtinên li Parîsê, her du aliyan li hev kiriye ku mekanîzmayeke nû ya parvekirina îstîxbaratê ava bikin. Ev mekanîzma ku dê di bin çavdêriya Amerîkayê de be, armanc dike ku pêşî li aloziyên leşkerî û têgihîştinên xelet ên li ser sînor bigire. Her wiha, cara yekem e ku her du welat li ser hevkariya di warên sivîl ên wekî enerjî, tenduristî û çandiniyê de danûstandinan dikin.

Barrack destnîşan kir ku piştî hilweşîna rejîma Beşar Esed, rêveberiya nû ya li Şamê nêzîkatiya xwe ya stratejîk guherandiye û dixwaze têkiliyên xwe li ser bingeha rêzgirtina hevbeş ava bike. Tevî ku li ser mijarên wekî Bilindahiyên Golanê hîn nakokî hene jî, Barrack bawer dike ku ev destpêka serdemeke nû ye ku dê aloziyên li herêmê kêm bike.