Îstixbarata Ûkraynayê: Rûsya plan dike ku îsal 120,000 bombeyên glide hilberîne

PeyamaKurd – Li gorî agahiyên ku ji aliyê îstixbarata leşkerî ya Ûkraynayê ve hatine belavkirin, Rûsya plan dike ku îsal kapasîteya xwe ya hilberîna bombeyên rêberkirî (glide) bi awayekî berbiçav zêde bike û bigihîne 120,000 yekîneyan. Ev plan di nav xwe de çêkirina nêzîkî 500 modelên nû yên dûravêj jî dihewîne.

Cîgirê Serokê Îstixbarata Leşkerî ya Ûkraynayê, Tumgeneral Vadîm Skîbîtskî ragihand ku pîşesaziya parastinê ya Rûsyayê ji destpêka dagirkirina berfireh a sala 2022yan ve hilberîna xwe bi awayekî dramatîk zêde kiriye û kargehên wê bê navber dixebitin. Skîbîtskî bi taybetî bal kişand ser zêdebûna hilberîna bombeyên glide, ku bi saya bask û motorên lêzêdekirî dikarin bigihîjin hedefên dûrtir.

Li gorî daneyên îstixbaratê, artêşa Rûsyayê her roj di navbera 200 û 250 bombeyên bi vî rengî li dijî Ûkraynayê bi kar tîne. Hat diyarkirin ku ev hejmar di meha borî de bi navînî 170 bû.

Her wiha, hate eşkerekirin ku Rûsya amadekariyan dike ku dest bi hilberîna girseyî ya bombeyên nû yên dûravêj bike ku menzîla wan digihîje nêzîkî 200 kîlometreyan. Armanc ew e ku heta dawiya salê 500 heb ji van bombeyên nifşê nû werin çêkirin. Ev pêngav weke gefeke nû û cidî li ser ewlehiya Ûkraynayê tê nirxandin.