Rûsyayê êrîşên Amerîkayê şermezar kir: Hincet bêbingeh In

PeyamaKurd – Wezareta Derve ya Rûsyayê bi daxuyaniyeke tund operasyona leşkerî ya Dewletên Yekbûyî yên Amerîkayê (DYA) ya li dijî paytext Karakasê şermezar kir. Moskowê destnîşan kir ku hincetên Washingtonê yên ji bo rewakirina vê destwerdana çekdarî "bê bingeh in" û nayên qebûlkirin. Rûsyayê ev êrîş wekî binpêkirina serweriya Venezûelayê pênase kir û ragihand ku dijminatiya îdeolojîk a Amerîkayê li ser çareseriyên pragmatîk serdest bûye.

Di daxuyaniya wezaretê de peyameke xurt a piştgiriyê ji bo hikûmeta Bolîvarî hat şandin û hevxemiya Rûsyayê ya bi gelê Venezuelayê re hat nîşandan. Moskowê tekez kir ku divê Amerîkaya Latîn bibe herêmeke aştî û aramiyê, ne qada şerên îdeolojîk. Her wiha Rûsyayê piştgiriya xwe ji bo daxwaza Venezuelayê ya lidarxistina civîneke lezgîn a Encûmena Ewlehiyê ya Neteweyên Yekgirtî ragihand, da ku rê li ber destwerdanên derveyî bê girtin.

Hate ragihandin ku dîplomatên Rûs li Karakasê bi rayedarên herêmî re di têkiliyê de ne. Tevî ku heta niha tu zanyarî li ser zirar dîtina welatiyên Rûsyayê di êrîşan de nînin, Moskowê bang kir ku mafê gelê Venezuelayê yê diyarkirina pêşeroja xwe bi awayekî serbixwe were parastin.