Zelenskyy: "Rûsyayê bi nêzîkî 1100 dronan û zêdetirî 50 moşekan êrîş kir"

PeyamaKurd – Serokê Ukraynayê Zelenskyy ragihand ku artêşa Rûsyayê di hefteya borî de bi nêzîkî 1100 wesayîtên hewayî yên bêmirov (UAV), zêdetirî 50 moşekan û zêdetirî 890 bombeyên rêberkirî êrîşî welatê wî kiriye.

Zelenskyy li ser hesabê xwe yê medyaya civakî agahî li ser êrîşên hewayî yên Rûsyayê yên di hefteya borî de parve kir.

Wî destnîşan kir ku artêşa Rûsyayê bi 1100 UAV, zêdetirî 50 moşekên cûrbecûr û zêdetirî 890 bombeyên rêberkirî, herwiha bi karanîna moşekên balîstîk ên hîpersonîk ên navîn-menzîl "Oreshnik" êrîşî Ukraynayê kiriye.

Zelenskyy diyar kir ku ji ber êrîşan li seranserê welêt xizmetguzariyên av, elektrîk û germkirinê hatine astengkirin û got, "Piştî êrîşên Rûsyayê yên li ser binesaziya krîtîk, li gelek herêman hîn jî şert û mercên giran hene."

Zelenskyy destnîşan kir ku artêşa Rûsyayê binesaziya krîtîk li Ukraynayê, nemaze di hewaya sar de, hedef digire û got, "Ev terora Rûsyayê ya bi zanebûn û sînîk a li dijî gel e."