Sêwirmendê payebilind ê Zelenskî îstifa kir

PeyamaKurd – Li Ûkraynayê erdhejeke siyasî pêk hat. Şêwirmendê herî nêzîk ê Serokkomar Volodîmîr Zelenskî û Serokê Kabîneyê Andrî Yermak, piştî lêpirsîna gendeliyê û biserdegirtina mala wî de îstifa kir.

Yermakê ku wekî "kesê duyemîn ê herî bi hêz" ê Ûkraynayê dihat naskirin, her çend hîn bi fermî bi tu sûcekî nehatibe tawanbarkirin jî, ji ber zextên mezin ên skandala gendeliyê neçar ma dev ji karê xwe berde.

Lêpirsîna 100 milyon dolarî

Buroya Neteweyî ya li dijî Gendeliyê (NABU) û Dozgeriya li dijî Gendeliyê, di çarçoveya lêpirsîneke berfireh de bi ser mala Yermak de girtin. Tê îdiakirin ku di sektora enerjiyê de nêzîkî 100 milyon dolar gendelî hatiye kirin û navê çendîn berpirsên payebilind di vê dosyayê de derbas dibe.

Îstifaya Yermak di demek gelekî hesas de hat. Ew wekî sermuzakerevanê Kîevê ji bo plana aştiyê ya Serokê Amerîkayê Donald Trump hatibû erkdarkirin. Pispor dibêjin ku ev skandal dê pozîsyona Ûkraynayê ya li ser maseya danûstandinan lawaz bike, nemaze di demekê de ku rayedarên Amerîkî amadekariya serdana Kîev û Moskowê dikin.

Zelenskî: "Helwêsteke welatparêzî ye"

Serokkomar Zelenskî piştî îstifayê daxuyaniyek da û got ku Yermak bi vê biryara xwe "welatparêziyek" nîşan daye da ku zirarê nede pêvajoyê. Zelenskî ragihand ku wî ji bo destnîşankirina şêwirmendekî nû dest bi şêwirînan kiriye.

Di vê navberê de, Serokê Rûsyayê Vladîmîr Pîtîn careke din şertê xwe yê ji bo aştiyê dubare kir û daxwaza vekişîna leşkerên Ûkraynayê ji herêmên nakok kir.