"Em dixwazin hêmanên ne-Sûrî ji HSDê werin derxistin"

PeyamaKurd – Hakan Fîdan got, "Hikûmeta Sûriyê û HSD dikarin di navbera xwe de li hev bikin. Lêbelê, dema ku mijar tê ser PKKê, em dizanin ku di nav HSDê de hin hêman hene. Em dixwazin hêmanên ne-Sûrî ji HSDê werin derxistin."

Wezîrê Derve yê Tirkiyê Hakan Fîdan beşdarî rûniştina hevpeyvînê ya "Newsmaker" a bi sernavê "Şêwekirina Mîmariya Ewlehiyê li Rojhilata Navîn û Çalakiyên Tirkiyeyê ji bo Avakirina Aramiyê li Herêmê" bû ku di çarçoveya 23yemîn Foruma Dohayê de li Dohaya paytexta Qeterê hate lidarxistin.

Fîdan bernameya ku ji hêla Patrick Wintour ê rojnameya Guardian ve hate pêşkêşkirin, bi pirsek li ser pêşketinên bilez ên li Sûriyê di sala borî de û fikarên Tirkiyeyê yên di derbarê Sûriyê de dest pê kir.

Fîdan diyar kir ku li ser vê mijarê gelek tişt hene ku werin gotin û got, "Serokê Sûriyê Ehmed El Şera berî min li vir bû. Wî rave kir ka çi diqewime û ew niha biryarder e. Ez difikirim ku ew di rewşek de ye ku bersiva hin pirsan bide. Di vî warî de, ew di rewşek çêtir de ye ji min. Me tiştê ku em ji HSD dixwazin eşkere kiriye"

Fîdan daxuyaniyên xwe wiha domand:

"Pêşî, divê em mijarên ewlehiyê yên sereke yên di rojeva hikûmeta Sûriyeyê de binirxînin. Ya duyemîn, divê em lêkolîn bikin ka Tirkiye çawa nirxandinên xwe yên ewlehî û gefê dinirxîne û çawa li vê mijarê dinêre. Me bi berdewamî li ser vê yekê israr kiriye: me bi zelalî diyar kiriye ku em ji HSD çi dixwazin. Bi heman awayî, hikûmeta Şamê hêviyên xwe bi zelalî eşkere kiriye.

Çend mijar hene ku ji bo me pir girîng in. Hikûmeta Sûriyeyê û HSD dikarin di navbera xwe de lihevkirinekê bikin. Ji ber ku hikûmeta Sûriyeyê hikûmetek serwer e û dikare peymanên xwe bike. Lêbelê, dema ku dor tê ser PKKê, em dizanin ku di nav HSDê de hin hêmanên diyarkirî hene û em dizanin ku armanca wan a yekane şerkirina li dijî Tirkiyeyê ye. Ji ber vê yekê, em dixwazin ku hêmanên ne-Sûrî ji HSDê werin derxistin. Em dixwazin ku hêmanên ku ji Iraq, Îran û Tirkiyeyê tevlî dibin tavilê derkevin. Ev ê destpêkek baş be."