HSD: Çêkerê bombeyan ê DAIŞê li Reqayê hat girtin

PeyamaKurd – Hêzên Sûriyeya Demokratîk (HSD) doh ragihandin ku di operasyoneke hevbeş de bi Hevpeymaniya Navneteweyî ya bi serokatiya Amerîkayê re, wan çend endamên DAIŞê girtine, di nav de kesekî ku di çêkirina bombeyan û gelek êrîşên terorîstî de beşdar bû.

HSDê diyar kir ku hêzên wan, bi hevrêziya bi hêzên hevpeymaniyê re, "operasyoneke ewlehiyê ya serketî" pêk anîne ku şaneyek DAIŞê li gundê Meşleb ê nêzîkî Reqayê hedef girtiye.

Di encamê de Xelef Husên Îbrahîm hate girtin ku HSD wî wekî endamekî yekîneya çêkirina bombeyan a DAIŞê destnîşan kir.

Li gorî daxuyaniyê, Îbrahîm îtîraf kir ku teqemeniyên destçêkirî (IED) yên ku li dijî hêzên HSD û hevpeymaniyê hatine bikar anîn çêkirine û çandine, û her weha teqemeniyan li şaneyên din ên DAIŞê belav kiriye.

Di dema operasyonê de, hêzên HSDê "çek, cebilxane, alavên ragihandinê û belgeyên kesane" jî desteser kirine.

Roja Sêşemê, Fermandariya Navendî ya Amerîkayê (CENTCOM) diyar kir ku di rêze operasyonên ku li Sûriyeyê di nav neh rojan de bi hevkarên herêmî re hatine kirin de herî kêm heft gumanbarên DAIŞê kuştine û gelekên din jî girtine.

Di daxuyaniya xwe ya dawiya salê de ku roja Çarşemê hate weşandin, HSD got ku wan di sala 2025an de 163 operasyonên ewlehî û leşkerî li dijî şaneyên DAIŞê pêk anîne, di encamê de bi dehan çekdar, di nav de sê serkirdeyên payebilind, hatine girtin an jî kuştin.