Li Kormorê sandina gazê ji nû ve dest pê kir: Tankerên yekem derketin rê

PeyamaKurd – Piştî êrîşa roja Çarşemê ya li ser Qada Gaza Kormorê li sînorê navçeya Çemçemalê, îro yekem car barkirina gazê hat kirin û tîmên teknîkî vegeriyan ser karê xwe.

Li gorî agahiyên ji herêmê, îro (29ê Mijdarê) saetên sibehê karwanek ku ji 8 tankeran pêk dihat, ji bo ceribandinê gaza LPGyê bar kirin û ber bi bajarên herêmê ve ketin rê.

Yûsif Nûrî, yek ji şofêrên tankeran, diyar kir ku wan saet 09:00ê sibehê dest bi barkirina gazê kiriye û got: 

"Em çûn û gaza xwe wekî ku em her car dikin bar kirin."

Nûrî destnîşan kir ku tesîsa depoya neftê ya ku hatibû hedefgirtin bi temamî şewitiye û zirar mezin e, lê tîmên teknîkî ji bo çakkirinê li qadê ne. Hat ragihandin ku her çend şandina gaza şile dest pê kiribe jî, operasyonên barkirina neftê hîn nehatiye destpêkirin.

Krîza elektrîkê didome

Tê payîn ku îro rayedarên Herêma Kurdistanê daxwazeke fermî pêşkêşî kompanyaya Dana Gas bikin da ku hilberîna gazê ji bo santralên elektrîkê jî ji nû ve bide destpêkirin.

Hêjayî bibîrxistinê ye ku di şeva 26ê Mijdarê de êrîşek li ser vê qadê pêk hatibû. Ji ber êrîşê hilberîna elektrîkê ya neteweyî ji sedî 80 kêm bûbû û dayîna elektrîkê bo welatiyan daketibû 5 saetan.