Midûrê Emniyeta Sirnexê gef li Hevsaredarên Cizîrê xwar: "Ev kiryara te ya dawî ye"

PeyamaKurd – Li navçeya Cizîrê, di dema sempozyuma ku Serok Mesûd Barzanî lê amade bû, Midûrê Emniyeta Şirnexê rê li ber Hevşaredarên Cizîrê girt û bi gotina "Ev çalakiya te ya dawî ye" gef li wan xwar.

Bûyer îro danê nîvro li ber otêla ku sempozyûm lê dihat lidarxistin pêk hat. Hevşaredarên Cizîrê Guler Tûnç Yerbasan û Abdurahîm Dûrmûş xwestin beşdarî bernameyê bibin, lê wesayîta wan li ber deriyê protokolê ji aliyê polîsan ve hat rawestandin û demek dirêj nehiştin derbas bibin.

Bi tiliyê gef xwar

Dema ku hevşaredaran hewl dan têkevin hundir, rastî helwesta hişk a Midûrê Emniyeta Şirnexê hatin. Wî tiliya xwe li Hevşaredar Guler Tunç Yerbasan hejand û gef lê xwar û got: "Ev kiryara te ya dawî ye."

Piştî vê gefxwarinê, ferman da polîsan ku mudaxeleyî hevşaredaran û girseya li gel wan bikin û wan ji herêma otêlê dûr bixin. Li hemberî van heqaret û gefan, Hevşaredaran biryar dan ku beşdarî bernameyê nebin û cihê bûyerê terk kirin.

Êrîş li ser Alaya Kurdistanê

Di heman demê de, polîsan êrîşî welatiyên ku ji bo pêşwazîkirina Serok Mesûd Barzanî Alaya Kurdistanê hildabûn jî kir.

Hat ragihandin ku ew kesên xwestin bi alayê silavê bidin Serok Barzanî, ji aliyê polîsan ve hatin derbkirin û ji derdora otêlê hatin hidûrxistin. Welatiyekî ku nerazîbûn nîşanî êrîşa polîsan da, hate binçavkirin.