Parlementerê AKPê Arslan Tatar bi xêrhatina serok Mesûd Barzanî kir

PeyamaKurd – Li bajarê Cizîre sempozyûma Melayê Cizîrî hat li darxistin. Di sempozyûmê de serokê Kurdistanê Mesûd Barzanî û heyetekî pê re tevlî sempozyûmê bûn.

Bi serok Barzanî re birayê wî Sîdad Barzanî, Serbest Lezgîn, parêzgerên Duhokê û Hewlêrê jî hebûn. Di axaftvanên di sempozyûmê de balkêş bû parlementerê AKPê yê bajarê Şirnexê Arslan Tatar jî hebû. Tatar di axaftina xwe de xîtabê Barzanî kir û got:

“…..Em birayên hevin û em ji hev xelas nabin. Serok Mesûd Barzanî, mamo, xalo, tu mamê minî, xalê minî. Tu ronahiya çavê me yî. Em di zarotiya xwe de bi xeyala te mezin bûne. Tu kurê wî zatî, tu kurê Mela Mistefa Barzanî yî. Me Kurdîtî dîtibe bi te dîtiye. Me bi bavê te dîtiye. Tu û heyeta xwe ji wê derê heya vê derê li ser serê me hatine…”

Di dîwana mala Barzaniyan de, ti carê Dîwana Melayê Cizîrî kêm nebûye û koka Rêbaza wêje, ziman û Kurdîniyê ya mala Barzaniyan diçe ser rêbaza Mela, Xanî û yên weka wan. Lewra jî serokê Barzanî seredana sempozyûma Melayê Cizîrî ya li Cizîrê kir.