Serok Barzanî li Cizîrê pistgiriya xwe ya ji bo astiyê anî ziman

PeyamaKurd – Serok Mesûd Barzanî îro bi serdaneke dîrokî gihîşt navçeya Cizîrê ya Şirnexê û beşdarî "4emîn Sempozyûma Navneteweyî ya Melayê Cizîrî" bû, lê belê ev serdana girîng bi aloziyekê dest pê kir. Her çiqas bajar ji bo vê serdanê bi pankartên "Hûn bi xêr hatin" hatibe xemilandin jî, girseya Kurdistaniyan a ku bi Alayên Rengîn (Alaya Kurdistanê) herikîbû qadan da ku pêşwaziya Serok Barzanî bike, rastî midaxeleya leşker û polîsan hat ku dixwestin bi alayên xwe ve pêşwaziyê bikin û rê nedan ku alayên Kurdistanê werin hildan.

Tevî vê aloziya li derve, Serok Barzanî li nava salona sempozyûmê ji aliyê akademîsyen û nûnerên partiyên siyasî ve bi coşeke mezin hat pêşwazîkirin. Berdevka DEM Partiyê Ayşegul Doganê serdan silav kir û bi gotina "Ew xwediyê malê ye, em hêvî dikin ev serdan bibe wesîleya aştiyê" girîngiya bûyerê anî ziman. Di destpêka axaftina xwe de, Serok Barzanî bal kişand ser girîngiya manewî û edebî ya Melayê Cizîrî û pêwendiya wî ya dîrokî bi Tekyeya Barzan re. Barzanî, Cizîrî wekî "stêrkeke geş ku qet venamire" pênase kir û diyar kir ku helbestên wî her tim li Tekyeya Barzan dihatin xwendin. Serok Barzanî ji bo nîşandana hezkirina xwe ya kûr a ji bo vî zanyarê mezin, di nava gotara xwe de çend beyt ji helbestên Melayê Cizîrî jî bi zimanê Kurdî xwendin û bi vî awayî rengekî edebî û hestiyar da civînê.

Mijareke din a gotara Serok Barzanî, peyamên wî yên der barê "pêvajoya nû" ya li Bakurê Kurdistanê û Tirkiyeyê bûn ku mohra xwe li rojevê xistin. Serok Barzanî bi eşkereyî piştgiriya xwe ya tam ji bo gavên aştiyê nîşan da û got:

"Em bi destpêkirina pêvajoyê gelekî kêfxweş bûn. Milet, parlamento û hemû partî piştgirê dewletê ne."

Serok Barzanî di dawiya axaftina xwe de spasiya Serokkomarê Tirkiyeyê kir û got ,"Ez spasiya Birêz Erdogan dikim" û her wiha ji bo Rêberê PKKyê Abdullah Ocalan jî peyameke erênî da û got: "Ez destxweşiyê li Birêz Ocalan dikim ku gavên erênî avêtin."