image

پەیامی کورد      ...     بوودجەیەک بۆ چارەسەری کێشەی کەم ئاوی لە چەمچەماڵ لە لایەن حکوومەتی هەرێمی کوردستانەوە تەرخان دەکرێت

وەزیری شارەوانی و گەشتوگوزار رایگەیاند، حکوومەتی هەرێم بۆ چارەسەری کێشەی کەم ئاوی قەزای چەمچەماڵ ٣ ملیار و ٨٥٠ ملیۆن دیناری تەرخانکردوە و بوودجەکەش بۆ  پرۆژەی پەرەپێدانی هێڵی ئاوی دووكان-١ و چاكسازی لەو بۆرییەدا بەمەبەستی پرۆسەی گەیشتنی ئاوی خاوێن بۆ قەزاکە بەکاردەهێنرێت.

ساسان عەونی، وەزیری شارەوانی و گەشتوگوزار لەبارەی پلانیان بۆ چارەسەركردنی گرفتی كەم ئاوی لە شاری چەمچەماڵ رایگەیاند، لیژنەیەکیان بەمەبەستی لێکۆڵینەوە لەکێشەی کەم ئاوی چەمچەماڵ پێکهێناوە و چەند راسپاردەیەکیان ئاڕاستەی حکوومەت کردوە، "دیارە پلانێكی درێژخایەن پێویستی بە گوژمەیەكی گەورە هەیە، ئەو پلانەمان داناوە و دەرخستەكانیش ئامادەن، بەڵام وەك چارەسەری ئێستاكە، دەرخستەكان رەوانەی سەرۆكایەتی ئەنجوومەنی وەزیران كراون و خەریكی دیراسەتكردنن".

سەبارەت بە چارەسەری كاتییش ئاماژەی بەوەکردوە، چارەسەری كەم ئاوی لە چەمچەماڵ بەشێوەی كاتی، لێدانی ١٠ بیری تازەی ئاو و راكێشانی بۆری و درووستكردنی تانكییەك بە قەبارەی ١٠٠٠ مەتر سێجا و كۆمپاكت یونتێك بۆ تەسفیە و پاڵدانی ئاو و چاكسازی و گۆڕینی بۆری ٩٠٠ ملم لە كانی شەیتانەوە.

وەزیری شارەوانی و گەشتوگوزار ئەوەشی خستوەتەڕوو، "ئەوانە هەمویان گوژمەی ٧ ملیار و ٦٨١ ملیۆن دینارە و هیواخوازین لە ئاییندەیەكی نزیكدا رەزامەندی لەسەر بدرێت، جگە لەمە دەمەوێت موژدە بدەمە هاوڵاتییانی شاری چەمچەماڵ كە جەنابی سەرۆكوەزیران لەم چەند رۆژە ڕەزامەندی پرۆژەی پەرەپێدانی هێڵی ئاوی دوكان (كۆن) كە ناسراوە بە دوكان1 كردوە بە گوژمەی ٣ ملیار و ٨٥٠ ملیۆن جێبەجێ دەکرێت".

ساسان عەونی دەڵێت، لەم کاتەدا لەسەر سێ ئاست و پلاندا كار لەسەر چارەسەركردنی گرفتی كەم ئاوی چەمچەماڵ دەكرێت، ئەوانیش پەرەپێدانی بۆری ئاوی دووكان١،  لێدانی ١٠ بیری تازە و گۆڕانكارییە لە بۆرییەكان و دروستكردنی خەزان و پلانی سێیەمیش کە پلانە درێژخایەنەكەیە بەهۆیەوە گرفتی كەمئاوی شاری چەمچەماڵ چارەسەر دەكات.

بە ووتەی هاووڵاتیان چەمچەماڵ تاكە چارەسەری کێشەی کەم ئاوی جێبەجێكردنی پڕۆژەی ئاوی گۆپتەپە-چەمچەماڵە كە بەهۆیەوە زیاتر لە ٢٠٠ هەزار هاوڵاتی لە تینوێتی ڕزگار دەكرێن، ناوەندی شار و شارەدێكانی شۆڕش و تەكیە و ئاغجەلەر و دەیان گوند، سوود لەو پڕۆژەیە وەردەگرن، بۆیە داواكارن فریای خەڵكی سنوورەكە بكەون و لە كێشەی كەم ئاوی ڕزگاریان بكەن.

پڕۆژەی ئاوی گۆپتەپە بڕیاربوو لە ساڵی ٢٠١٣ جێبەجێ‌ بكرێت، بەڵام بەهۆی قەیرانی  ئابووری و بوونی گرفت لەنێوان کۆمپانیای جێبەجێکار و وەزارەتی شارەوانی کارکردن لەپڕۆژەکەدا راگیرا، لەئێستاشدا كۆمپانیای ئەندازیاری گافی ئەڵمانی  ئامادەیی دەربڕیوە پڕۆژەكە تەواو بكات.