image


پەیامی کورد … شوانێکی کورد بە تەقەی هێزەکانی ئێران کوژرا

 

هاووڵاتییەکی خەڵکی مەریوان کە لە نزیک سنوور خەریکی لەوەڕاندنی ئاژەڵەکانی بووە،  بە تەقەی ڕاستەوخۆی هیزە چەکدارەکانی کۆماری ئیسلامیی ئێران کوژر.

 

بە گوێرەی هەواڵێکی ڕێکخراوی مافی مرۆڤی هەنگاو، ڕۆژی پێنجشەممە ٢٤ی حوزەیرانی ٢٠٢١، هاووڵاتییەکی خەڵکی گوندی "ئەسکۆڵ"ی سەر بە شاری مەریوان بە ناوی "محەمەد حسێنی" تەمەن ۲۳ ساڵ و کوڕی کەماڵ، لە کاتی لەوەراندنی ئاژەڵەکانیدا لە نزیک سنووری مەریوان بە تەقەی ڕاستەوخۆی هێزە چەکدارەکانی ئێران کوژرا.

 

بە گوتەی سەرچاوەیەکی ئاگادار، هێزەکانی بنکەی سەربازیی کانی کەوگی مەریوان بە بێ هیچ جۆرە ئاگادارکردنەوەیەکی پیشوەختە و لە مەودایەکی نزیکەوە دەسڕێژیان لەو شوانە کوردە کردووە و کوشتوویانە.

 

بە پشت بەستن بە ئاماری تۆمار کراو لە ناوەندی ئامار و بەڵگەنامەکانی ڕێکخراوی مافی مرۆڤی هەنگاو، لە ماوەی شەش مانگی رابردوودا و لە سەرەتای ساڵی ۲۰۲۱ تا ئیستا لانی کەم ۸ هاووڵاتیی مەدەنی  لە شارە جیاوازەکانی کوردستان بە تەقەی ڕاستەوخۆی هیزە چەکدارەکانی ئیران کوژراون.