ئیسرائیل: هیچ ئاسۆیەک بۆ ڕێککەوتن لەگەڵ دیمەشق نییە

ڕۆژنامەی (یەدیعۆت ئەحرۆنۆت)ی ئیسرائیلی بڵاویکردەوە کە تەل ئەڤیڤ نامەی توندی ئاراستەی ئەحمەد شەرع، سەرۆکی سووریا کردووە، ئەوەش دوای ئەو ڕووداوە نائاساییەی کە تێیدا شەش سەرباز بریندار بوون.
بەگوێرەی سەرچاوە ئەمنییەکان کە ڕۆژنامەکە لێی گواستووەتەوە، ناوەڕۆکی نامەکە ئەوەی لەخۆگرتووە کە تەل ئەڤیڤ ناتوانێت لەو ناوچانە بکشێتەوە کە کۆنترۆڵی کردوون، بۆ ئەوەی لایەنە نەیارەکان تێیدا جێگیر نەبن، هەروەها ئەوەشی زیاد کردووە کە "لە ئێستادا هیچ ئاسۆیەک بۆ ڕێککەوتن لەگەڵ دیمەشق نییە".
کەناڵی ١٣ی ئیسرائیلی ئاماژەی بە پێشهاتەکانی ئۆپەراسیۆنەکەی شارۆچکەی "بەیت جەن" لە باشووری سووریا کردووە و ڕوونی کردووەتەوە کە دەزگا ئەمنییەکانی ئیسرائیل بەرەو کەمکردنەوەی ئۆپەراسیۆنەکانی دەستگیرکردنی مەیدانی و زیادکردنی پشتبەستن بە ئۆپەراسیۆنەکانی تیرۆرکردنی ئاسمانی دەچن.
کەناڵەکە لە زاری فەرماندە ئەمنییەکانەوە گواستوویەتیەوە کە ئەوەی لە "بەیت جەن" ڕوویدا بۆسەیەکی پێشوەختە دانراو نەبووە، بەڵکو ڕوونیان کردووەتەوە کە ڕووداوەکە کاردانەوەی خەڵکی ناوچەکە بووە کە جموجۆڵی سوپایان بینیوە، بۆیە کۆبوونەتەوە و بە چڕی تەقەیان کردووە.
لە لای خۆیەوە، سوپای ئیسرائیل ڕایگەیاند کە هێزەکانی لیوای یەدەگی ٥٥، لەژێر فەرماندەیی فیرقەی ٢١٠، شەوی ڕابردوو ئۆپەراسیۆنێکیان لە شارۆچکەی "بەیت جەن" بۆ دەستگیرکردنی داواکراوان ئەنجامداوە.
بەپێی زانیارییە هەواڵگرییەکان، لە کاتی ئۆپەراسیۆنەکەدا هێزەکان ڕووبەڕووی تەقەکردن بوونەتەوە و بە پشتیوانیی هێزی ئاسمانی وەڵامیان داوەتەوە، ئەوەش بووەتە هۆی برینداربوونی دوو ئەفسەر و سەربازێکی یەدەگ بە سەختی، و یەکێکی دیکە بە برینی مامناوەند، جگە لە برینداربوونی دوو کەسی دیکە بە سووکی ئۆپەراسیۆنەکە بە دەستگیرکردنی سەرجەم داواکراوان و کوشتنی ژمارەیەک چەکدار کۆتایی هات.