واشنتۆن ئۆپەراسیۆنی "ڕمحی باشوور" ڕادەگەیەنێت

پەیامی کورد- دیمەشق
وەزیری جەنگی ئەمریکا، پیت هیگسیث، دوێنێ پێنجشەممە، دەستپێکردنی ئۆپەراسیۆنێکی نوێی بە ناوی "ڕمحی باشوور" بۆ بەدواداچوونی تۆڕەکانی بازرگانیکردن بە ماددە هۆشبەرەکان ڕاگەیاند و دووپاتی کردەوە کە ویلایەتە یەکگرتووەکان نیوەگۆی ڕۆژاوا بە درێژکراوەی دراوسێی ڕاستەوخۆی خۆی دەزانێت و کار بۆ پاراستنی دەکات لە ڕێکخراوە تاوانبارەکان.
هیگسیث لە بڵاوکراوەیەکدا لە پلاتفۆرمی "X" ڕوونی کردەوە کە جێبەجێکردنی ئۆپەراسیۆنەکە بە ئاراستەکردنی ڕاستەوخۆ لەلایەن سەرۆک دۆناڵد ترامپەوە بووە و زیادی کرد: "ئەمڕۆ دەستپێکردنی ئۆپەراسیۆنی ڕمحی باشوور ڕادەگەیەنین" و دووپاتی کردەوە کە ئامانج لێی "پاراستنی وڵات و دوورخستنەوەی تیرۆریستانی ماددە هۆشبەرەکان لە ناوچەکە و پاراستنی وڵات لە ژەهرەکان کە گەلی ئەمریکا وێران دەکەن."
سەرەڕای ڕاگەیاندنەکە، وەزیر هیچ وردەکارییەکی دیکەی لەبارەی سروشتی ئۆپەراسیۆنەکە یان ئەوەی کە چۆن جیاوازە لە هێرشەکانی کە لە چەند هەفتەی ڕابردووەوە دەستیان پێکردووە، ئاشکرا نەکرد.
ئیدارەی ترامپ هێرشەکانی لە دژی ئەو بەلەم و کەشتیانە چڕتر کردووەتەوە کە واشنتۆن دەڵێت تێوەگلاون لە قاچاخچێتی ماددە هۆشبەرەکاندا لە دەریای کاریبی و زەریای هێمن، بە بەکارهێنانی توانای دەریایی و ئاسمانی، لەوانە کەشتی هەڵگری فڕۆکەی "جیرالد فۆرد" کە لەم دواییانەدا گەیشتە نزیک کەناراوەکانی ئەمریکای لاتین.
لە چەند هەفتەی ڕابردوودا، ویلایەتە یەکگرتووەکان هێرشی کردووەتە سەر نزیکەی 20 بەلەمی گوماناوی لە ئاوە نێودەوڵەتییەکاندا، کە دەڵێت بۆ قاچاخچێتی ماددە هۆشبەرەکان بەکاردەهێنران، و بەپێی داتاکانی ئەمریکا، لانیکەم 76 کەس کوژراون، بەبێ پێشکەشکردنی بەڵگەی ملموس لەسەر سروشتی چالاکی ئەو بەلەمانە.
ئەم ئۆپەراسیۆنانە شەپۆلێک ڕەخنەی نێودەوڵەتی و نیگەرانییان دروستکردووە کە ڕەنگە ڕەهەندی سیاسییان هەبێت، لە ناو گومانەکاندا کە واشنتۆن هەوڵی ڕووخاندنی سەرۆکی ڤەنزوێلا نیکۆلاس مادۆرۆ دەدات. هەروەها تۆڕی "سی بی ئێس نیوز" لە چەند سەرچاوەیەکەوە گواستوویەتیەوە کە سەرکردە سەربازییەکان بژاردەی دیکەیان پێشکەش بە ترامپ کردووە، لەوانەش ئەگەری ئەنجامدانی هێرشی ئاسمانی لە ناو ڤەنزوێلادا.
لە بەرامبەردا، حکومەتی ڤەنزوێلا ڕۆژی سێشەممە ڕایگەیاند کە یەکە سەربازییەکانی "بە چڕی" لە سەرانسەری وڵاتدا بڵاوکردووەتەوە بۆ ڕووبەڕووبوونەوەی ئەوەی کە ناوی لێنا "هەڕەشەی ئیمپریالیستی"، و دووپاتی کردەوە کە هێزەکانی وشکانی و ئاسمانی و دەریایی و ڕووباری، جگە لە موشەک و سیستەمی چەکی جیاواز، و هێزەکانی میلیشیای بۆلیڤاری کە لە هاوڵاتیانی مەدەنی و سەربازانی پێشوو پێکهاتوون بۆ پشتگیریکردنی سوپا و دەزگا ئەمنییەکان، بڵاوکردووەتەوە.
کاراکاس نیگەرانە لەوەی کە جوڵەی سەربازی ئەمریکا، کە بریتییە لە بوونی فڕۆکە جەنگییەکانی F-35 لە پۆرتۆ ڕیکۆ و شەش کەشتی جەنگی لە ئاوەکانی کاریبیدا، ڕەنگە ئامادەکارییەک بێت بۆ ئۆپەراسیۆنێک کە ئامانجی گۆڕینی سیستەمی سیاسی وڵات و دوورخستنەوەی مادۆرۆ بێت.