واشینتۆن پۆست : تورکیا ئەگەری زۆرە بۆ مادۆرۆ ئەگەر ڤەنزۆئێللا بکەوێت

پەیامی کورد   ...   واشینتۆن پۆست : تورکیا ئەگەری زۆرە بۆ مادۆرۆ ئەگەر ڤەنزۆئێللا بکەوێت

ڕۆژنامەی واشینتۆن پۆست لە ڕاپۆرتێکی نوێدا بڵاویکردەوە، ئەگەری ڕووخانی حکوومەتەکەی، نیکۆلاس مادۆرۆ سەرۆکی ڤەنزۆئێللا تورکیا وەک شوێنی دەربەدەری خۆی هەڵدەبژێرێت، ئەمەش بژاردەیەک کە بەگوێرەی سەرچاوە ئاگادارەکان، هەم "سەلامەت" و هەم "قبووڵکراوە" لەلایەن حکوومەتی ئەمریکاوە.

بەگوێرەی ڕاپۆرتەکە، بەرپرسێکی حکوومەتی ئەمریکا کە ئاگاداری ئەو بابەتەیە ڕایگەیاندووە، مادۆرۆ متمانەی بە ڕەجەب تەیب ئەردۆغان هەیە و پەیوەندییە نزیکەکانی نێوان هەردوو ووڵات وا دەکات تورکیا وەک "شوێنێکی سرووشتی و سەلامەت" بۆ ئەو دەربکەوێت. ئەردۆغان یەکێک بوو لەو سەرکردە کەمانەی کە ڕاستەوخۆ پشتیوانی خۆی بۆ مادۆرۆ ڕاگەیاند دوای هەڵبژاردنە مشتومڕئاوییەکانی ساڵی ٢٠٢٤ی ڤەنزۆئێللا.

ئەو سەرچاوەیە هەروەها ڕایگەیاندووە، هەر ڕێککەوتنێکی ئەگەری بۆ گواستنەوەی مادۆرۆ بۆ تورکیا دەتوانێت "گەرەنتی" وەک ڕێگریکردن لە ڕادەستکردنەوەی مادۆرۆ بە ئەمریکا لەخۆبگرێت. مادۆرۆ ڕووبەڕووی تۆمەتی بازرگانی کردن بە ماددە هۆشبەرەکان و گەندەڵی و تیرۆر دەبێتەوە لە ئەمریکا، هەروەها خەڵاتی 50 ملیۆن دۆلاری بۆ گرتنەکەی پێشکەش کراوە.

بژاردەیەکی سەلامەت بۆ مادۆرۆ، چارەسەرێکی ناجەنگ بۆ ترامپ

شرۆڤەکاران دەڵێن، دیپۆرتکردنەوەی مادۆرۆ بۆ تورکیا دەتوانێت ڕێگە بە ئیدارەی ترامپ بدات گۆڕانکاری سیاسی لە ڤەنزۆئێللا بهێنێتە ئاراوە بەبێ ئەوەی پەنا بۆ کردەوەی سەربازی بەرفراوان ببات. ترامپ پێشتر هەڕەشەی دوورخستنەوەی مادۆرۆی کردبوو کە "بە ڕێگەی ئاسان یان بە ڕێگەی سەخت".

بۆچی تورکیا و هاوپەیمانەکانی ئێستای مادۆرۆ نا؟

سەرەڕای پشتیوانی تەقلیدی بۆ مادۆرۆ لە لایەن کوبا و ڕووسیا و کۆماری ئیسلامی ئێران ەوە، بەڵام شارەزایان پێیان وایە هیچ کام لەو ووڵاتانە شیاو نین بۆ دیپۆرت کردنەوەی، چوونکە ئەمنیەتی پێویست دابین ناکەن یان لە ڕووی سیاسی یەوە لە لایەن ئەمریکاوە قبووڵ کراوە.

یەکێک لە شرۆڤەکارەکان دەڵێت : "ئەگەر بچێتە ڕووسیا، نامێنێت؛ ئەگەر بچێتە کوبا یان ئێران، ئازادی و ئاسایشی نابێت؛ بەڵام تورکیا لەلایەن هەردوولاوە قبووڵ کراوە."

تۆڕی دارایی مادۆرۆ لە تورکیا

بەگوێرەی ڕۆژنامەی واشینتۆن پۆست، مادۆرۆ ساڵانێکە زێڕ و سەرچاوەی دارایی بەرفراوان دەگوازێتەوە بۆ تورکیا و ئێستا ئەو ووڵاتە میوانداری بەشێکی بەرچاوی تۆڕی دارایی هاوکارە نزیکەکانی دەکات. ئەمەش ڕۆڵی تورکیا وەک شوێنێکی "سەلامەت و متمانەپێکراو" بەهێزتر دەکات.

بەگوێرەی ڕۆژنامەکە، ئیدارەی ترامپ هەوڵ دەدات سوود لە ڕۆڵی نێوەندگیری تورکیا لە دۆسیە ناوچەییەکانی وەک شەڕی غەززە و دانووستانەکانی ئۆکراین وەربگرێت.

ڕاپۆرتەکە لە کاتێکدایە لە چەند هەفتەی ڕابردوودا هەواڵی ئۆپراسیۆنە نهێنییەکانی ئەمریکا لە نزیک ڤەنزۆئێللا و ئەگەری بژاردە سەربازییەکان دەرکەوتووە، ئەوەش بەهۆی زیادبوونی گرژییەکانی نێوان واشینتۆن و کاراکاس. بەڵام دۆناڵد ترامپ ڕایگەیاندووە کە تا ئێستاش "ئامادەیە بۆ قسەکردن" لەگەڵ مادۆرۆ.