بەڕێوبەری پۆلیسی هەولێر ئامانجی دەستپێکردنی قۆناغێکی نوێ ده‌خاته‌ڕوو

پەیامی کورد   ...   بەڕێوبەری پۆلیسی هەولێر ئامانجی دەستپێکردنی قۆناغێکی نوێ ده‌خاته‌ڕوو

بەڕێوبەری پۆلیسی پارێزگای هەولێر ڕایدەگەێنێت، قۆناغی کرداری ڕیفۆرم لە پۆلیس بە هەماهەنگی و بەشداری پۆلیسی ئەورووپی لە سنووری پارێزگای هەولێر دەستی پێکرد. دەشڵێ، لەم قۆناغەدا کار لە پێناو درووستکردنی پردی متمانە و ڕێز لە نێوان پۆلیس و هاووڵاتییاندا دەکەین.

بەڕێوبەری پۆلیسی پارێزگای هەولێر (عەمید کامل بەرزنجی)، لە لێدوانێکدا ڕایگەیاند، قۆناغی کرداری ڕیفۆرم لە پۆلیس بە هەماهەنگی و بەشداری پۆلیسی ئەورووپی لە سنووری پارێزگای هەولێر لە بنکەی پۆلیسی کەسنەزانی سەر بە بەڕێوبەرایەتیمان دەستی پێکرد.

بەڕێوبەری پۆلیسی پارێزگای هەولێر، پەیوەست بە ئامانجەکانی دەستپێکردنی ئەو قۆناغە نوێیە، ئەوەی خستەڕوو، لەم قۆناغە کردارییەدا، بە هەماهەنگی لەگەڵ راوێژکارانی دەستەی ڕاوێژکاری یەکیتی ئەورووپا (EUAM) و "رۆندک فارس" بەڕێوبەری ئەکادیمیای سەرکردایەتی و بەڕێوەبردن، کار لە پێناو درووست کردنی پردی متمانە و ڕێز لە نێوان پۆلیس و هاووڵاتییان و چۆنیەتی مامەڵەکردن لەگەڵ هاووڵاتیاندا دەکرێت.

(عەمید کامل) هێمای بۆ ئەوەش کرد، بەهێزکردنی متمانەی هاووڵاتی بە دامەزراوەی پۆلیس و بایەخدان و درووست کردنی پەیوەندییەکی پتەو و تۆکمە لەگەڵ هاووڵاتیان و چەسپاندنی بنەماکانی مافی مرۆڤ، لە پێشینەی کارەکانی حکوومەتی هەرێمی کوردستان و وەزارەتی ناوخۆیە.