بەرهەمهێنانی گاز لە کێڵگەی کۆرمۆر دەست پێ دەکاتەوە
کۆمپانیای دانەگاز ئاشکرای کرد کە بەرهەمهێنانی گاز لە کێڵگەی کۆرمۆر دەست پێدەکاتەوە.
ئەمڕۆ سێشەممە 30/4/2024، کۆمپانیای دانەگاز لە ڕاگەیەندراوێکدا جەختی لەسەر دەستپێکردنی هەنگاوەکانی بەرهەمهێنانی گاز لە کێڵگەی کۆرمۆر کردووەتەوە.
هەروەها کۆمپانیاکە راشی گەیاندووە: "بەگوێرەی ئەو هەنگاوە كردارییانەی گیراونەتەبەر لەلایەن هەردوو حكوومەتی عێراق و هەرێمی كوردستانەوە بۆ بەهێزتركردنی ئاسایشی كێڵگەی گازی كۆرمۆر و وەرگرتنی بەڵێن و پابەندبوون لە ئاستی باڵا، دانەگاز و هاوبەشەكانی دەستیان بە ڕێكاری پێویست بۆ دەستپێکردنەوەی كار و بەرهەمهێنان لە كێڵگەی كۆرمۆر، كردووە."
ڕۆژی هەینی 26/4/2024، بە درۆن هێرشکرایە سەر کێڵگەی گازی کۆرمۆر و لە ئەنجامدا چوار کارمەندی بە رەگەز یەمەنی لە کێڵگەکە کوژران و ژمارەیەک کارمەندی دیکەش دیکەش برینداربوون.
کێڵگەی غازی کۆرمۆر، لە ساڵی 2007 دامەزراوە، دەکەوێتە سنووری ناحیەی قادر کەرەمی سەر بە قەزای چەمچەماڵ لە پارێزگای سلێمانی، کۆمپانیای دانەغاز وەبەرهێنانی تێدا دەکات.