سەرۆکی هەرێمی کوردستان لەكۆبوونه‌وه‌یه‌كدا له‌گه‌ڵ مارتین یێگەر، باڵیۆزی تازەی ئاڵمانیا لە عێراق دووپاتی کردەوە کە هاوکاری و پشتگیری سەربازی، مرۆیی و سیاسی ئاڵمانیا بۆ هەرێمی کوردستان هەرگیز لە بیر ناکرێن و بەردەوامی پشتگیری ئاڵمانیای بۆ عێراق و هەرێمی کوردستان بە مایەی خۆشحاڵی و گرینگ و پێویست زانی.

بەیانی ئەمڕۆ سێشەممە 2021/10/26  نێچیرڤان بارزانی، سەرۆکی هەرێمی کوردستان، پێشوازی لە مارتین یێگەر، باڵیۆزی تازەی ئاڵمانیا لە عیراق کرد.

لە کۆبوونەوەیەکدا هەڵبژاردنەکانی عیراق، ئەنجامەکانی و خوێندنەوە و پێشنبینییەکان بۆ داهاتووی پرۆسەی سیاسی لە ووڵات، برەودان بە پەیوەندییەکانی ئاڵمانیا لەگەڵ عیراق و هەرێمی کوردستان و دۆخی عیراق بەگشتی، تاوتوێ کران.

باڵیۆزی ئاڵمانیا دڵنیایی دا و دووپاتی کردەوە کە دوای هەڵبژاردن و بە هاتنە سەرکاری حکوومەتێکی تازە لە بەرلین، هەمان سیاسەت و مامەڵەی ئەڵمانیا لەگەڵ عیراق و هەرێمی کوردستان وەک خۆی درێژە دەکێشێت و ووڵاتەکەی لە پشتگیری عیراق و هەرێمی کوردستان، هەروەها وەک ئەندامێکی هاوپەیمانی نێودەوڵەتی دژی داعش بەردەوام دەبێت. ئاماژەی بەوەش دا کە لە نزیکەوە لەگەڵ وەزارەتی پێشمەرگە بۆ چاکسازی و یەکخستنەوەی پێشمەرگە کار دەکەن و ڕۆڵی سەرۆکی هەرێمی کوردستانی لەمبارەیەوە بە گرینگ لە قەڵەم دا.

لای خۆیەوە نێچیرڤان بارزانی وێڕای پیرۆزبایی دەستبەکاربوون و هیوای سەرکەوتن بۆ باڵیۆزی ئاڵمانیا، سوپاس و پێزانینی هەرێمی کوردستانی بۆ ئەڵمانیا دەربڕی و دووپاتی کردەوە کە هاوکاری و پشتگیری سەربازی، مرۆیی و سیاسی ئاڵمانیا بۆ هەرێمی کوردستان هەرگیز لە بیر ناکرێن و بەردەوامی پشتگیریی ئەڵمانیای بۆ عیراق و هەرێمی کوردستان بە مایەی خۆشحاڵی و گرینگ و پێویست زانی.

پێشهاتەکانی ئەفغانستان، دۆخی ناوچەکە بەگشتی و چەند پرسێکی دیکەی جێی بایەخی هاوبەش، تەوەرێکی دیکەی کۆبوونەوەکە بوون کە کونسوولی گشتی ئاڵمانیا تیایدا ئامادە بوو.