پەیامی کورد   ...   ئۆرتێگاس : کۆماری ئیسلامی و حیزبوڵڵا هۆكاری ناسەقامگیری لە ڕۆژهەڵاتی ناوەڕاستن

مۆرگان ئۆرتێگاس، جێگری نوێنەری تایبەتی ئەمریکا بۆ ڕۆژهەڵاتی ناوەڕاست، ڕۆژی دووشەممە لە وتووێژێکدا لەگەڵ کەناڵی ئەلعەرەبییە، کۆماری ئیسلامی وەک هۆکاری سەرەکی ناسەقامگیری ناوچەکە ناساند و خوازیاری داماڵینی دەستبەجێی چەک لە تاقمی تیرۆریستی حیزبۆڵڵا بوو.

ئەو ئەم تاقمە تیرۆریستییەی كە لە لایەن ئێرانەوە پاڵپشتی دەکرێت بە "شێرپەنجە" ناوبرد کە لوبنانی گەیاندووەتە وێرانکاری و دەبێت بە تەواوی لەناوببردرێت.

ئۆرتێگاس بە ئاماژەدان بە پێکدادانەکانی ئەم دواییەی نێوان لوبنان و ئیسرائیل جەختی لەوە کردەوە کە ئەم شەڕە دەرئەنجامی بڕیاری حیزبۆڵڵا و کۆماری ئیسلامییە.

ناوبراو ڕایگەیاند: لە ٨ی ئۆكتۆبری ٢٠٢٣دا ئەوە حیزبۆڵڵا و ئێران بوون کە لوبنانیان بۆ شەڕێکی نەخوازراو لەگەڵ ئیسرائیل ڕاكێشا، شەڕێك كە هیچ كات خەڵكی لوبنان ئەوەیان نەویستووە.

ناوبراو هەروەها ڕەخنەی لە سیاسەتەکانی پێشووی دانووستانەکانی ئەمریکا لەگەڵ ئێران گرت و ڕایگەیاند کە ئیدارەی نوێی ئەمریکا ڕێبازی دوور و درێژ و ناڕاستەوخۆی ئیدارەی بایدن پەیڕەو ناکات.

هەروەها ڕوونی کردەوە: ئێمە بەشداری دانووستانی بێ کۆتایی ناکەین؛ "هەر دیالۆگێک لەگەڵ ئێران دەبێ خێرا و ڕاستەوخۆ و  ئەنجامی  هەبێت".

ناوبراو زیادی کرد: ئێران نەک هەر خۆی لە بەرپرسیارییەتی بەرانبەر ناوچەکە بەدوور دەگرێت، بەڵکوو کردەوەکانی بووەتە هۆی نائارامی لە سەرانسەری ڕۆژهەڵاتی ناوەڕاستدا.

ئۆرتێگاس لە کۆتاییدا جەختی لەسەر پێویستی چەکداماڵینی حیزبۆڵڵا کردەوە.