پەیامی کورد   ...    ئۆمێد خۆشناو  : هەولێر لە قەیرانێکی گەورەی ئاو دایە

پارێزگاری هەولێر رایگەیاند، لە ئێستادا هەرێمی کوردستان و هەولێری پایتەخت رووبەڕووی بێ ئاوی و وشکە ساڵی بونەتەوە و لە چوارچێوەی بەرنامەکانی ژووری ئۆپراسیۆنی پارێزگای هەولێر ئاوی ئیفرازی 1، 2 و 3 کەوتونەتەوە کار، هەروەها ئاوی قەندیل کەوتەوە کار دوای بووژانەوەیەک بەهۆی ئەو بارانەی کە لە تورکیا باری و ئاوی روبارەکانی ژیانەوە.
ئومێد خۆشناو، پارێزگاری هەولێر ئەمڕۆ سێشەممە لەمیانی کۆنگرەیەکی رۆژنامەوانیدا رایگەیاند، "بەداخەوە ئەمساڵ هەولێر و هەرێمی کوردستان لە قەیرانێکی گەورەی ئاودان، سەرچاوەی ئاوی هەولێر کە دو جۆر سەرچاوەیە و سەرەتاکانی لە مانگی (ئایار/5)ەوە هێماکانی دەرکەوتوە کە ووشکبوونی بیرەکانە و سەرچاوەی دووەمیش سەرچاوەی ئاوی سەرزەوی گرفتی هەبوە، بەڵام لە ماوەی رابردوو لە چوارچێوەی بەرنامەکانی ژووری ئۆپراسیۆنی پارێزگای هەولێر ئاوی ئیفرازی 1، 2 و 3 کەوتونەتەوە کار، هەروەها ئاوی قەندیل کەوتەوە کار دوای بووژانەوەیەک بەهۆی ئەو بارانەی کە لە تورکیا باری و ئاوی رووبارەکانی ژیانەوە".

ئاماژەی بەوەشکرد، ئێستا هەندێک گەڕەک کێشەی ئاویان ماوە بەهۆی ئەوەی هەندێک شەبەکەی ئاو بەتەواوی پڕ نەبوون و ئاو دەگاتە ئەو گەڕە و شوێنانەی دیکەش، پێشتر لە چوارچێوەی ژووری ئۆپراسیۆنەکان بۆ چارەسەرکردنی کێشەکان نزیکەی ٣٢ بیری نوێ لێدراون و ١٥٠ بیریش چ بە شۆڕکردنەوەی بۆڕی و چ بە چاککردنی ماتۆڕەکانیان کەوتونەتەوە کار و زیاتر لە ١٨٠ بیر چاککراون.

پارێزگاری هەولێر باسی لەوەشکرد، سەرۆکی حکوومەت بە دابینکردنی بڕە پارەیەک هاوکاری کردوون بۆ دەربازبون لەو قەیرانە، لەگەڵ ئەوەشدا داوایان لە خێرخوازان و کونسوڵی وڵاتان کردوە هاوکاریان بکەن، بۆیە کونسووڵی ووڵاتی ئیمارات بەشداری کردوە و ئەمڕۆ لە یەکەم هەنگاویاندا لە سنووری قوشتەپە بە لێدانی بیرێک هەڵمەتی هاوکاریان بۆ پارێزگای هەولێر دەستپێدەکات.
ئومێد خۆشناو وتیشی، داوا لە هاوڵاتیان دەکەن دەست بەئاوەوە بگرن و هاوکاریان بکە لەوەی ئاو بە خەسار نەدەن، هەرکەسێکیش ئاو خەسار بکات رێکاری یاسایی بەرامبەر دەگیرێتە بەر.

ئەم بابەتە 11990 جار خوێندراوەتەوە