پەیامی کورد     ...   ئەمریکا داوا لە هەموو لایەنە کوردییەکانی ڕۆژئاوای کوردستان دەکات یەکگرتوو بن و دانووستانەکان بگەیننە ئامانج

سەرۆکی نوێنەرایەتی ئەنەکەسە لە ھەرێمی کوردستان و ئەندامی ئەنجوومەنی نیشتیمانی کورد لە سووریا رایگەیاند، ئەمریکا ڕەتی کردووەتەوە کە ھیچ ھەنگاوێک بێ ئەنەکەسە لە رۆژئاوای کوردستان بنێت و، داوا دەکات کورد یەکڕیز بن و دانووستان دەست پێبکاتەوە.

نەواف حەسەن، ڕایگەیاند : "ئەوەی تەڤدەم بڵاوی کردووەتەوە کە گوایە ئەمریکا بۆ ھەموو ھەنگاوێک دەگەڕێتەوە بۆ ئێمە، ئەمە ڕاست نییە و ئەمریکا ئەوەی ڕەت کردووەتەوە و باسی لەوە کردووە، کە ھەر ھەنگاوێک بنرێت، بێ ئەنەکەسە نابێت، بۆیە ئەمریکا داوا دەکات کورد لە رۆژئاوای کوردستان یەکگرتوو بێت و دانووستانەکان دەست پێبکەنەوە، ئێمەش بۆ ئەو کارە مەرجمان ھەیە، چوونکە ناکرێت تەڤدەم لە کردەوەکانیان دژی ئێمە بەردەوام بن و دانووستانیش بکرێت".

حەسەن ووتیشی: "تەڤدەم ماوەی چوار ساڵە ١٠بەرپرسی پارتەکانی سەر بە ئەنەکەسەی دەستگیر کردووە و تا ئێستا چارەنووسیان دیار نییە و ئامادەش نین چارەنووسیان دیاری بکەن، کەسوکاری گیراوانیش ھاتوون بۆ لای ئێمە و داوا دەکەن تەڤدەم چارەنووسی زیندانیان دیاری بکەن، جا بە زیندوویی بێت یان بە مردوویی".

ناوبراو باسی لەوەش کرد: "تەڤدەم و سەرۆکی شاندی ئەوان بۆ دانووستان، بەردەوامن لە دژایەتیکردنی ئێمە، ئەوەش رێگا خۆش ناکات بۆ ئەوەی دانووستانەکان دەست پێبکەنەوە، چوونکە ناکرێت دانووستان بەو شێوەیە بەردەوام بێت".

ئەم بابەتە 11989 جار خوێندراوەتەوە