پەیامی کورد   ...   ئەنجامی بەرایی هەڵبژاردنەکانی سوید بڵاوکرایەوە و چوار کورد سەرکەوتنیان بەدەستهێنا

به‌پێی ئه‌نجامی بەرایی هەڵبژاردنه‌ گشتییه‌كان و خۆجێییه‌كانی سوید، پارتی سۆسیال دیموكرات به‌ سه‌رۆكایه‌تی ماگدالێنا ئەندێرسن سەرۆکوەزیران یه‌كه‌م بووه‌، هەروەها چوار کاندیدی کورد کە سیانیان خەڵکی باکووری کوردستانن سەرکەوتنیان بەدەستهێناوە.

له‌ هه‌ڵبژاردنه‌كاندا كه‌ حه‌وت ملیۆن و ٧٠٠ هه‌زار ده‌نگده‌ر به‌شدارییان كرد، پرۆسه‌ی ده‌نگدان كاتژمێر ٢٠:٠٠ به‌كاتی ناوخۆی ووڵاته‌كه‌ كۆتایی هات.

به‌پێی ئه‌و راپرسییانه‌ی كه‌ له‌ بنكه‌كانی ده‌نگدان ئه‌نجامدراون و ته‌له‌ڤزیۆنی فه‌رمی سوید SVT بڵاویكردوونه‌ته‌وه‌ تائێستا پارتی سۆسیال دیموکرات زۆرترین دەنگی بەدەستهێناوە، کە ٣٠.٦% و پارتی رەگەزپەرستەکان توانیویەتی ٢٢.٥%ی دەنگەکانی بەدەستبهێنێت.

هەروەها پارتی مۆدێرات ١٥.٨% و سەنتەر پارتی ٧.١% و پارتی کریس دیموکرات ٥.٦% و پارتی ژینگە ٤.٩% و پارتی چەپ ٨.٣% و پارتی لیبراڵ ٣.٦%ی دەنگەکانیان بەدەستھێناوە.

سەرجەم پارتە بچووکەکان توانیویانە ٢.٢%ی دەنگەکانیان بەدەستبێنن.

کورسی پارتەکان بە پێی ئەنجامە بەراییەکان بەم شێوەیەیە:

-پارتی سۆسیال دیموكرات: ١٠٧ كورسی

-پارتی دیموكراتەكانی سوید: ٧٤ کورسی

-پارتی مۆدێرات: ٦٣ کورسی

-پارتی چەپ: ٢٧ کورسی

-پارتی سەنتەر: ٢٤ كورسی

-پارتی کریستیان دیموكرات: ١٩کورسی

-پارتی سەوز: ١٩ کورسی

-پارتی لیبراڵ: ١٦کورسی

ئەم بابەتە 11992 جار خوێندراوەتەوە