ئەنجوومەنی باڵای فەتوا ڕوونکردنەوەیەک بڵاو دەکاتەوە
پەیامی کورد ... ئەنجوومەنی باڵای فەتوا ڕوونکردنەوەیەک بڵاو دەکاتەوە
ئەنجوومەنی باڵای فەتوا لەبارەی وەرگرتنی ڤاکسین روونکردنەوەیەکی بڵاوکردەوە و رایگەیاند، بەو پێیەی ناوەندە زانستی و پزیشکییەکان و رێکخراوی تەندرووستی جیهانی جەخت لە پێویستی وەرگرتنی ژەمە ڤاکسین دەکەنەوە لە پێناو سەلامەتی گیانی مرۆڤ کەمکردنەوەی ئەم نەخۆشیە، وەرگرتنی ئەو ژەمە ڤاکسینە لە رووی شەریعەتی پیرۆزی ئیسلامەوە هیچ گرفتێکی نییە.
ئەنجوومەنی باڵای فەتوا لە کوردستان ئەمڕۆ چوارشەممە لە راگەێندراوێکدا بڵاویکردەوە، "بەو پێیەی ناوەندە زانستی و پزیشکییەکان و رێکخراوی تەندرووستی جیهانی جەخت لە پێویستی وەرگرتنی ژەمە ڤاکسین دەکەنەوە لە پێناو سەلامەتی گیانی مرۆڤ کەمکردنەوەی ئەم نەخۆشیە، ئەوە بۆ رای گشتی رادەگەینین، کە وەرگرتنی ئەو ژەمە ڤاکسینە لە رووی شەریعەتی پیرۆزی ئیسلامەوە هیچ گرفتێکی نییە".
ئاماژەی بەوەشکردوە، یەکێک لە مەبەستەکانی شەریعەت پارێزگاریکردنە لە گیان و سەلامەتی مرۆڤ، بەکارهێنانی چارەسەری پزیشکیش بەپێی رێنمایی بواری تەندرووستی و خۆپاراستنیش لەو چوارچێوە شەرعییەدایە، خوای گەورە هەموان بپارێزێت لە هەمو نەخۆشی و نەخۆشییەک.
دوێنێ لیژنەی باڵای رووبەڕووبوونەوەی کۆرۆنا ژمارەیەک کۆبوەوە و ژمارەیەک بڕیاری دەرکرد و دوای کۆبوونەوەکەش جووتیار عادل، ووته‌بێژی حكوومه‌تی هه‌رێمی كوردستان له‌كۆنگره‌یه‌كی رۆژنامه‌وانیدا رایگه‌یاند، له‌به‌ر پابه‌ندنه‌بوونی هاووڵاتیان به‌ڕێكاره‌كانی خۆپارێزی، ناچارین رێكاره‌كان توند بكرێنه‌وه، له‌ره‌نگی نارنجیدایه هه‌رێم و ئه‌گه‌ری هه‌یه بگاته هێڵی سوور، له‌م حاڵه‌ته ناچار ده‌بین رێكاری زۆر تووندتر بگرینه‌به‌ر و قه‌ده‌غه‌ی هاتووچۆش له‌به‌رده‌م لیژنه‌ی باڵای رووبه‌ڕووبوونه‌وه‌ی كۆرۆنا كراوه ده‌بێت، ئه‌گه‌ر ژماره‌ی تووشبوانی كۆرۆنا زۆر زیاتر بێت.
لە بڕیارەکانی لیژنەی باڵای رووبەڕووبوونەوەی کۆرۆنا هاتوە، پێویستە شوێنە ئایینی و بازاڕ و مۆڵ و دوکاندار و شوێنە گەشتیارییەکان و چێشتخانە و کافترا و ھۆتێل و مۆتێلەکان، کارمەندانەکانیان ڤاکسین بەکاربھێنن، یان تاقیکردنەوەی ٧٢ کاتژمێری پێ بێت. لێژنەکان بە دواداچوونی بۆدەکەن و ھەر شوێنێک سەرپێچی بکات سزا دەدرێت و شوێنەکەی دادەخرێت.
ئەوەش هاتووە، پێویستە ھەموو فەرمانبەرانی حکوومەتی ھەرێمی کوردستان، ڤاکسین وەربگرن و بە ماسکەوە دەوام بکەن، ھەر فەرانبەرێک رێکارەکان جێبەجێ نەکات، ئەوە بەپێی یاسای بەرزەفتی فەرمانبەران مامەڵەی لەگەڵ دەکرێت، لیژنەی ھاوبەشی وەزارەتی تەندرووستی و ناوخۆ و فەرمانگەی ھەماھەنگی و بە دواداچوونیش ھەڵسەنگاندنی بۆ جێبەجێکردنی رێکارەکان لە گشت دامودەزگاکانی حکوومەت دەکات.
ئەم بابەتە 11990 جار خوێندراوەتەوە