پەیامی کورد    ...   ئەیاد عەللاوی: هێرشەکەی سەر هەولێر ئاماژەیەکی مەترسیدارە

ئه‌یاد عه‌للاوی، سه‌رۆكی هاوپه‌یمانی نیشتمانی ئیدانه‌ی هێرشه‌ مووشه‌كییه‌كه‌ی هه‌ولێری كرد و رایگه‌یاند، سه‌ركۆنه‌ و سه‌رزه‌نشتی ئه‌و كاره‌ ترسنۆكانه‌ ده‌كه‌ین و داوای ئه‌نجامدانی لێكۆڵینه‌وه‌ی جیددی ده‌كه‌ین له‌و تاوانكارییانه‌.

ئه‌یاد عه‌للاوی، له‌ هه‌ژماری تایبه‌تی خۆی له‌ تۆڕی كۆمه‌ڵایه‌تی تویته‌ر نووسیویه‌تی: بۆردومانی مووشه‌كی، كه‌ شه‌وی رابردوو هه‌ولێری كرده‌ ئامانج، ئاماژه‌ی مه‌ترسیداری ده‌ستێوه‌ردانی زه‌قن له‌ عێراق.

ئاماژه‌ی به‌وه‌ش كردووه‌، سه‌ركۆنه‌ و سه‌رزه‌نشتی ئه‌و كاره‌ ترسنۆكانه‌ ده‌كه‌ین و داوای ئه‌نجامدانی لێكۆڵینه‌وه‌ی جیددی ده‌كه‌ین له‌و تاوانكارییانه‌ و پێویسته‌ سنوورێكی بۆ دابنرێت، له‌ به‌رامبه‌ریشدا به‌ هیچ شێوه‌یه‌ك نابێت خاكی عێراق بۆ هێرشكردنه‌ سه‌ر ووڵاتانی دراوسێ به‌كاربهێندرێت.