بانكی ره‌شید مه‌رجه‌كانی پێدانی قه‌رزی ٢٠ ملیۆن دیناری به هاووڵاتیان راگه‌یاند
پەیامی کورد ... بانكی ره‌شید مه‌رجه‌كانی پێدانی قه‌رزی ٢٠ ملیۆن دیناری به هاووڵاتیان راگه‌یاند
بانكی ره‌شیدی عێراقی ئه‌مڕۆ چوارشه‌ممه رایگه‌یاند، به‌سێ مه‌رج قه‌رزی ٢٠ ملیۆن دیناری ده‌ده‌نه هاووڵاتیان و رێژه‌ی سوویی سه‌ر قه‌رزه‌كه‌ش، ٥% ده‌بێت.
باسم عه‌بد عه‌لی به‌ڕێَوبه‌ری گشتی بانكی ره‌شید ڕایگەیاند ، بانكه‌كه‌یان قه‌رز ده‌دات به‌و فه‌رمانبه‌ره‌ی كه مووچه‌كانیان له ڕێگه‌ی ماسته‌ركارده‌وه وه‌رده‌گرن، اوه‌ی سێ رۆژیشه ده‌ستیان به پێدانی ئه‌و قه‌رزه كردوه، بۆ هه‌ر ١٠ ملیۆن دینارێك رێژه‌ی ٥% سوود وه‌رده‌گیرێت و كۆی گشتی قه‌رزه‌كه‌ش ٢٠ ملیۆن دیناره.
ووتیشی، "قه‌رزه‌كه له‌ڕێگه‌ی پێشكه‌شكردنی فۆڕمێكی ئه‌لیكترۆنییه‌وه ده‌بێت، ئه‌و كه‌سانه‌ی ئاره‌زوومه‌ندن، ده‌توانن له‌سه‌ر پێگه‌ی بانكی ره‌شید فۆڕمه‌كه پڕبكه‌نه‌وه".
سه‌باره‌ت به‌مه‌رجه‌كانی وه‌رگرتنی قه‌رزه‌كه‌ش، به‌ڕێوبه‌ری گشتی بانكی ره‌شید روونیكرده‌وه، كه‌سێك ئه‌گه‌ر ناسنامه‌ی ژووری بازرگانی به‌غدای هه‌بێت، یاخود بۆ دووكان پاره‌ی بوێت، ده‌توانێت وه‌ری بگرێت و به‌رێژه‌ی ٥% سوودی ده‌چێته‌سه‌ر، هه‌روه‌ها ئه‌و كه‌سانه‌شی خانه‌نشینن ده‌توانن وه‌ری بگرن و به‌رێژه‌ی ٤% سوودیان بۆ ده‌خرێته‌سه‌ر قه‌رزه‌كان، بۆ ماوه‌ی پێنج ساڵیش ده‌توانن پاره‌كه بگه‌ڕێننه‌وه".
بانكی ره‌شید هاوشانی بانكی رافده‌ینه و هه‌ردووكیان له‌ڕێگه‌ی بانكی ناوه‌ندی عێراقه‌وه پاڵپشتی ده‌كرێن و پێشتریش له‌ڕێگه‌ی چه‌ندین جۆر قه‌رزه‌وه، فه‌رمانبه‌ر و خانه‌نشینان و هاووڵاتیان له‌و دوو بانكه سوودمه‌ند بوون، به‌ڵام له‌به‌رئه‌وه‌ی لقیان له هه‌رێمی كوردستان نیه، فه‌رمانبه‌ر و هاووڵاتیانی هه‌رێم ناتوانن لێی سوودمه‌ندبن.
ئەم بابەتە 11990 جار خوێندراوەتەوە