بەریتانیا " مارک پریسۆن ڕیچاردسۆن " ی لە جیاتی ستێفان هیکی وەکوو باڵیۆزی نوێی ووڵاتەکەی لە بەغدا ڕاسپاردە و جێگیر کرد .

بە گوێرەی زانیارییەکان مارک پریسۆن ڕیچاردسۆن لە پەیامێکدا ڕایگەیاند پێخۆشحاڵە کە بۆ دووەمجار لە عێراق دەبێت دوای ئەوەی چەند ساڵێک لەمەوبەریش وەک یاریدەدەری باڵیۆز لە بەغدا کاری کردووە.

ئاماژەی بەوەش کردووە، بەو پێیەی مسوڵمانە خواستی ئەوەی هەیە زانیاری زیاتری هەبێت لەسەر عێراق، دەشڵێت، "بەشێک لەکاتەکانم بۆ قسەکردن لەگەڵ کوڕەکەم عەلی لە لەندەن تەرخان دەکەم بۆ باشترکردنی زمانی عەرەبی".

25ی حوزەیران وەزارەتی دەرەوەی بەریتانیا لەراگەیەنراوێکدا باسی لەوەکردبوو، مارک پریسۆن ڕیچاردسۆن لەمانگی تەمموزی ئەمساڵەوە وەک باڵیۆزی وڵاتەکەی لە عێراق دەستبەکار دەبێت و جێگەی ستیڤن هیکی باڵیۆزی بەریتانیا دەگرێتەوە کە لەمانگی ئەیلولی٢٠١٩ەوە لەو پۆستەدایە.

باڵیۆزی نوێی بەریتانیا پێشووتر وەک دیپلۆماتکار  لە ساڵەکانی ٢٠١٣ - ٢٠١٤ لە عێراق کاری کردووە، هەروەها ماوەی زیاتر لە ٢٢ ساڵ ئەزموونی وەک دیبلۆماتکار لە وەزارەتی دەرەوەی بەریتانیا هەیە.

مارک پریسۆن لەو ماوەیەدا لە باڵیۆزخانەکانی ووڵاتەکەی لە خارتووم، کابوڵ، مەکەدیشۆ کاری کردووە.