پەیامی کورد     ...    بۆ یەکەمین جار لە مێژووی خۆیدا بە پێی پیلانی هاوپەیمانان کوردستان بڕیار وایە ببێتە خاوەن سوپایەکی یەکگرتوو 

كار لەسەر دروستكردنی سوپایەكی یەكگرتوو بۆ ھەرێمی كوردستان دەكرێت و سەرۆكی لیژنەی پێشمەرگەش لە پەرلەمانی كوردستان دەڵێ، بەپێی پلانی ھاوپەیمانان، تا ساڵی ٢٠٢٥ ھەرێمی كوردستان دەبێتە خاوەن سوپایەكی یەكگرتوو.

رێڤینگ ھرووری، سەرۆكی لیژنەی پێشمەرگە لە پەرلەمانی كوردستان، رایگەیاند: "بەرنامەی چاكسازی لە ھێزەكانی پێشمەرگە كەوتووەتە بواری جێبەجێكردن و ھاوپەیمانانیش ھاوكارن بۆ رێكخستنەوەی ھێزەكانی پێشمەرگە و پلان وا دانلااوە، كە تا ساڵی ٢٠٢٥ ھەرێمی كوردستان ببێتە خاوەن لەشكرێكی یەكگرتوو، ئێمەش لە پەرلەمانی كوردستان و وەزارەتی پێشمەرگەش، كار بۆ ئەو پلانە دەكەین".

سەرۆكی لیژنەی پێشمەرگە دەشڵێت: "یەكگرتنەوەی ھێزی پێشمەرگە لە چوارچێوەی سوپایەكی یەكگرتوودا، پێویستی بە بڕیارێكی سیاسی ھەیە، بە تایبەتی لەلایەن پارتی و یەكێتییەوە".

ھرووری ئاماژەی بۆ ئەوەش كرد: "ھەردوو یەكەی ٧٠ و ھەشتا رەزامەندییان پیشان داوە بۆ ئەوەی بخرێنە چوارچێوەی وەزارەتی پێشمەرگەوە، پارتی و یەكێتیش ئەوەیان دووپات كردووەتەوە، كە ھەردوو یەكەی ٧٠ و ٨٠ راسپێردراون میلاكانی خۆیان پێشكەشی وەزارەتی دارایی و ئابووری بكەن، تا لە قۆناغی یەكەمدا یەكەی ژمێریارییان بۆ بكرێتەوە و دواتر قۆناغەكانی دیكە بەڕێوە بچن".

ئەم بابەتە 11986 جار خوێندراوەتەوە