پەیامی کورد     ...    بەیان سامی: هەنگاوەکەی پارتی لە ئەمریکا پێشوازییەکی گەرمی لێکراوە

لە میانەی وێبینارەکانی هەفتانەی لقی ٦ی ئەورووپای پارتی دیموکراتی کوردستان و زنجیرە وێبینارەکانی تایبەت بە دیبلۆماسیەتی کوردی ، بەیان سامی عەبدۆلڕەحمان، ئەندامی ئەنجوومەنی سەرکردایەتی پارتی دیموکراتی کوردستان و نوێنەری حکوومەتی هەرێم لە ئەمریکا، تیشکی خستە سەر پەیوەندییەکانی نێوان هەرێم و ئەمریکا و دواڕۆژی ئەو پەیوەندیانە و هاوپەیمانیەتی نێوان هەردوولا.

نوێنەری حکوومەتی هەرێمی کوردستان لە ئەمریکا، پەیوەندییەکانی هەرێمی کوردستانی لەگەڵ ئەمریکا بە پێشکەوتوو وەسف کرد و جەختی لەسەر کاری بەردەوامیان کردەوە بە مەبەستی بەهێزترکردنی ئەو پەیوەندیانە. ووتیشی، خەڵکی ئەمریکا ئێستا دەزانن کوردستان چییە و پێشمەرگەیان خۆش دەوێت، هەروەها کاربەدەستان و کۆنگرێسمانەکانی ئەمریکا شانازی بە پێشمەرگەی کوردستان دەکەن کە شانبەشانی ئەمریکییەکان شەڕی تیرۆر دەکەن.

خاتوو بەیان ڕوونیشی کردەوە، دیموکراسیەتی کوردستان و ئازادی ڕا دەربڕین، هەروەها بوێری و قارەمانیەتی هێزەکانی پێشمەرگە لە شەڕی دژی داعش شانبەشانی هاوپەیمانیەتی نێوەدەوڵەتی و لەئامێزگرتنی زیاتر لە ملیۆنێك پەنابەر و ئاوارەی ناوخۆ و پێکەوەژیانی ئاشتیانەی هەموو پێکهاتە و نەتەوە و ئایینەکان لە هەرێم، وای کردووە ئەمریکا وەك هاوبەش و هاوپەیمان مامەڵە لەگەڵ هەرێمی کوردستاندا بکات.

هاوکات باسی ئەوەی کرد، کەوا هەرێمی کوردستان توانیویەتی بێیتە یاریکارێکی سەرەکی و گرینگ لە ناوچەکە و بە بایەخ و گرینگییەوە جیهان مامەڵەی لەگەڵدا دەکات. ئەوەشی بۆ دیپلۆماسیەتی حەکیمانەی سەکردایەتیی سیاسیی کوردستان گەڕاندەوە. ووتیشی، ئێستا ئەمریکا لە هەموو دیدار و کۆڕ و کۆبوونەوەیەکی فەرمیدا داوەتی نوێنەرانی هەرێمی کوردستان دەکات و دیالۆگی ستراتیژی عێراق و ئەمریکاشی وەك نموونە هینایەوە. 

ئاماژەشی بەوەدا، کە ئەمریکا گرینگییەکی گەورە بە چاکسازی لە وەزارەتی پێشمەرگە و یەکگرتنەوەی هێزەکانی پێشمەرگە و درووستکردنی سوپایەکی نیزامی بۆ کوردستان دەدات، ووتیشی هەنگاوەکەی پارتی دیموکراتی کوردستان بە گواستنەوەی هێزەکانی هەشتا بۆ سەر وەزارەتی پێشمەرگە پێشوازییەکی گەرمی لێکراوە لە ئەمریکا و هەنگاوێکی گەورە بوو بۆ سەرخستنی چاکسازی نێودەولەتی لە وەزارەتی پێشمەرگەی کوردستان.

نوێنەری حکوومەتی هەرێمی کوردستان هەروەها ووتی، کەوا لەگەڵ بوونی ئەو هاوپەیمانیەتییە و هەماهەنگی و هاریکاری بەردەوامی ئەمریکا بۆ هەرێمی کوردستان، بەڵام پێویستە ئێمە واقیعبینانە بیر بکەینەوە و هەنگاو بنێین و ستراتیژیەتی خۆمان هەبێت و بەردەوام بین لە چاکسازی و گەشەدان بە دیپلۆماسیەتمان و بە ئابووری هەرێمی کوردستان. ووتیشی، توانیومانە لە ڕێگای ڕێکخراوە کوردییەکان کاری باش ئەنجام بدەین، هەروەها بە بەردەوامی کار لەسەر گەشەدان بە چالاکییەکانیان دەکەین لە ئەمریکا و کەنەدا، چوونکە لەو بڕوایەداین ڕەوەندی کوردستانی دەتوانن شانبەشانی دیپلۆماتکارانی کورد، خزمەتێکی گەورە بە پرسە ڕەواکانی کوردستان بکەن، ئەویش لە ڕێگای لۆبیکردن و سوودوەرگرتن لە لۆبیکردنی نەتەوەکانی تر کە توانیویانە کاریگەری گەورە لەسەر بڕیار درووستکردن لە ئەمریکا بکەن.

ئەم بابەتە 11990 جار خوێندراوەتەوە