پەیامی کورد     ...   بە فەمانی سەرۆکایەتی ئەنجوومەنی وەزیران ئەم کەسانە دەبنە خاوەن زەوی

لەسەر فەرمانی سەرۆکایەتی ئەنجوومەنی وەزیران زەوی بۆ خانەوادەی ئەو شەھیدانە دابین دەکرێت کە پێشتر فەرمانی وەرگرتنی زەوییان ھەبووە و بەڕێوبەری گشتی شەھیدانی ھەولێریش دەڵێت، لە سنووری پارێزگای ھەولێر یەک ھەزار و ٥٠٠ وارسی شەھید سوودمەند دەبن.

داماو موحەمەد، بەڕێوبەری گشتی شەھیدان و ئەنفالکراوانی ھەولێر ڕایگەیاند: "پێشتر لە شاری ھەولێر چوار ھەزار و ٧٠٣ پارچە زەوی لە کەرتی باغەمرە بەسەر کەس وکاری شەھیدان و ئەنفالکراواندا دابەش کراوە، دوای ھەوڵێکی زۆر دەست بە تاپۆکردنی ئەو زەوییانە کراوە و تا ئێستا ژمارەیەک لەو زەوییانە کراونەتە سەنەد و بڕیارە ھەموو ئەو زەوییانەی پێشتر بەسەر کەسوکاری شەھیدان و شەھیدانی جینۆساید دا دابەش کراون و کارتن، دەکرێن بە تاپۆ."

بەڕێوبەری گشتی شەھیدان و ئەنفالکراوانی ھەولێر دەشڵێت: "وەجبەی ھەشتەمی زەوی بەسەر کەس وکاری شەھیداندا دابەش دەکرێت و فەرمانی وەرگرتنی زەوی بۆ ١٥٠٠ وارسی شەھیدان لە وەزارەتی شەھیدانە و بڕیارە زەوییان بۆ دابین بکرێت."

داماو موحەمەد ڕوونی کردەوە: "لەگەڵ بڕیاری سەرۆکایەتی ئەنجوومەنی وەزیران بۆ دابینکردنی زەوی تا لەسەر ئەو وارسانەی شەھیدان دابەش بکرێت ئەوانەی فەرمانی وەرگرتنی زەوییان ھەیە، ئێمەیش ھەوڵەکانمان چڕ کردووتەوە تا لە داهاتوویەکی نزیکدا زەوی بەسەر کەس وکاری شەھیداندا دابەش بکرێت، چوونکە بڕیاری سەرۆکایەتی حکوومەتە ھەر خانەوادەیەکی شەھید فەرمانی وەرگرتنی زەویی ھەبێت سوودمەند دەبێت."

ئەم بابەتە 11991 جار خوێندراوەتەوە