پەیامی کورد      ...     بە پێی بڕیارێک ئەم گەرەکانەی هەولێر خزمەتگوزاری یان بۆ دابین دەکرێت

دوای بڕیاری ئاوەدانکردنەوەی کەرتی ٨ ی حەسارۆک، بڕیارە ژمارەیەک کەرتی دیکەش ئاوەدان بکرێنەوە و سەرۆکی شارەوانی ھەولێر دەڵێت، ئەو گەڕەکانە ھیچ ئاوەدانییان بۆ نەچووە و بڕیارە بۆ یەکەم جار ئاوەدان بکرێنەوە.

عەبدۆلواحید ئەحمەد، سەرۆکی شارەوانی ھەولێر، ڕایگەیاند: "دوای بڕیاری ئاوەدانکردنەوەی کەرتی ٨ ی حەسارۆک، ژمارەیەک گەڕەکی دیکە لە شاری ھەولێر ھەن کە چەندین ساڵە دابەش کراون و تا ئێستا ھیچ خزمەتگوزارییەکیان پێشکەش نەکراوە و خەڵکێکی زۆر چاوەڕێی گەیاندنی خزمەتگوزارین بۆ ئەوەی بتوانن ئاوەدانی بکەنەوە، چوونکە ئەو گەڕەکانەش ھاوشێوەی ٨ ی حەسارۆک پێویستیان بە خزمەتگوزاری ھەیە."

سەرۆکی شارەوانی ھەولێر دەڵێت: "بڕیارە خزمەتگوزاری بۆ ھەریەک لە گەڕەکی گردجووتیار، کەڕک، باغلۆمنارە و بەشێکی تیمار دابین بکرێت، ئەویش دوای دیتنەوەی چارەسەری قۆناغ بە قۆناغ ئاوەدان دەکرێنەوە."

عەبدۆلواحید ئەحمەد ڕوونی کردەوە: "گەیاندنی خزمەتگوزاری بۆ ئەم گەڕەکانە دەبێتە ھۆی بووژانەوەی ئابووریی ھەولێر و جگە لەوەی ھاووڵاتییانێکی زۆر سوودمەند دەبن لە ئاوەدانکردنەوەی خانوو، کاریگەری لەسەر دەرفەتی کاریش دادەنێت، بازاڕی ھەولێر بەرەو پێشڤەچوونێکی بەرچاو دەچێت، لەبەر ئەوەی کە کار پەیدا بوو جووڵە دەکەوێتە بازاڕەوە."

ئەم بابەتە 11997 جار خوێندراوەتەوە