پەیامی کورد      ...   بە پێی بڕیارێک بانکێکی نیشتیمانی دادەمزرێت

بڕیارە بانكێكی نیشتیمانی لە ھەرێمی كوردستان دابمەزرێت و بەڕێوبەری گشتی بانكە بازرگانییەكانیش دەڵێ، رەزامەندی ئەنجوومەنی وەزیران وەرگیراوە و ھاوشێوەی بانكەكانی دیكەی نیشتیمانی لە عێراق، توانای پێدانی پێشینەی ھەیە.

مەولوود سابیر، بەڕێوبەری گشتی بانكە بازرگانییەكان، رایگەیاند : بڕیارە بانكێكی نیشتیمانی لە ھەرێمی كوردستان دابمەزرێت و قۆناغی زۆر باشی بڕیوە بۆ دامەزراندنی بانكەكە، سەرۆكایەتی ئەنجوومەنی وەزیران رەزامەندی لەسەر دامەزراندنی بانكی نیشتیمانی دەربڕیوە و لەلایەن وەزیری دارایی و ئابوورییەوە فەرمانی بۆ دەركراوە.

بەڕێوبەری گشتی بانكە بازرگانییەكان ووتیشی، ئەو داواكاریانەی حكوومەتی فیدڕاڵ داوای كردووە، سەرقاڵین جێبەجێیان دەكەین، لە داهاتوویەكی نزیكیشدا رێكارەكانی كردنەوەی بانكێكی نیشتیمانی تەواو دەبن و بانكەكە دادەمەزرێت.

سابیر ئاماژەی بۆ ئەوەش كرد، بانكی نیشتیمانی بە شێوەی پشك دەبێت و ھەموو ئەو شایستانەی لە بەغدا ھەیە بۆ بانكەكانی عێراقی، بۆ ھەرێمی كوردستانیش دەبێت، ئەو بانكە بە سەرمایەیەكی زۆر دادەمەزرێت و توانای پێدانی پێشینەكانی ھەیە، وەك پێشینەی پیشەسازی و كشتوكاڵ و ئەوانی دیكە.

ئەم بابەتە 11987 جار خوێندراوەتەوە