پەیامی کورد      ...    بە پێی بڕیارێک بە دوو ڕێگا بەنزین هەرزان دەکرێت

جێگری سەرۆکی لیژنەی سامانەسرووشتییەکان لە پەرلەمانی کوردستان، دەڵێ، بڕیارە وەزارەتی سامانە سرووشتییەکان و پەرلەمان و نوێنەری هەر سێ پارێزگا، لەبارەی کەمکردنەوەی نرخی بەنزین کۆببنەوە، بۆ ئەو مەبەستەش دوو رێگا هەن کە بتوانن نرخی بەنزین کەمبکەنەوە، لەوانە باجی سەر هاوردەکردنی بەنزین کەمبکرێتەوە.

گولیزار رەشید سندی، جێگری سەرۆکی لیژنەی سامانە سرووشتییەکان لە پەرلەمانی کوردستان، دەڵێ :  "چاوەڕێ دەکەین ژوورێک درووست بکرێت بۆ تاوتوێ کردنی نرخی بەنزین و کەمکردنەوەی نرخەکەی، نوێنەری وەزارەت و پەرلەمان و هەر سێ پارێزگا لە هەرێمی کوردستان کۆبوونەوەیەک ئەنجام دەدەین، لەبارەی هۆکاری گران بوونی نرخی بەنزین، کە ئێستا جارێکی دیکە نرخەکە بەرزبۆتەوە.

گولیزار ڕەشید ووتیشی:  "خۆی بەنزین کە لە ئێران دێت، گران بووە، تا دەگاتە هەرێم نرخەکە گرانتر دەبێت، هۆکارێکی دیکە هەیە ئەویش کە کوالیتی بەنزین خراپ بووە، بۆیە وەزارەت هەندێک مەرجی بۆ هاوردەکردنی بەنزین دانابوو، ئەمەش وایکرد هەموو کۆمپانیایەک نەیتوانی بەنزین هاوردە بکات، باجیش زیاتر بوو، بۆیە ئەمە بووە گرفتێک و ئێستا کار دەکرێت بۆ ئەوەی باج کەمبکرێتەوە و نرخی بەنزین کەمبێتەوە.

سندی باسی لەوەشکرد: حکوومەتی هەرێمی کوردستان لە پاڵاوگەیەکی ناوخۆیی کە بەنزین بەرهەم دێت، بۆ هەر پارێزگایەک دەیداتە کۆمەڵێک بەنزینخانە، ئێمە داوامان کرد، کە هەر جارە و بدرێتە کۆمەڵێک بەنزینخانە، نەک تەنیا بدرێت بە کۆمەڵێک بەنزینخانەی دیاریکراو، بۆ ئەوەی هەمووان لێی سوودمەند بن، چوونکە ئەوانە نرخی بەنزین بە ٦٦٠ دینار دەفرۆشن .

ووتیشی: بڕیارە بەم دوو رێگایە کێشەی گرانبوونی نرخی بەنزین هەرزان بکرێت، چوونکە کە باج کەمکرایەوە و جیاوازیش لە نێوان بەنزینخانەکان نەکرا، کە بەنزینیان بە هەرزان بۆ دابین دەکرێت، ئەوکات نرخی بەنزین بەوشێوە گران نابێت و هەرزان دەبێت.

ئەم بابەتە 11994 جار خوێندراوەتەوە