پەیامی کورد     ...     تیمێکى پێشمەرگەى سەر بە " کۆمەڵە ی زەحمەتکێشان " لە لایەن دەزگاى زانیاری و ئاسایشەوە دەستبەسەر دەکرێن و لێیان دەدرێت

ڕۆژی چوارشەممە ڕێکەوتى ١٤/٧/٢٠٢١، کۆمەڵە پێشمەرگەیەکى " کۆمەڵەى زەحمەتکێشانى کوردستان " کە بە نیاز بوون لە سنوورى نێوان مەریوان ـ پێنجوێن (هۆشیارى) بپەڕنەوە بۆ ناوخۆى نیشتمان، لە لایەن دەزگاى زانیاری و ئاسایشەوە دەستبەسەر دەکرێن.

بە پێى ئەو زانیارییانەى کە بڵاوکراوەتەوە ئەم تیمەى کۆمەڵەى زەحمەتکێشانى کوردستان کە ژمارەیان ٥ کەس بوونە ، لە سنوورى هۆشیارى (سنوورى مەریوان) چواردەورەیان لێدەگیرێت و چەک دەکرێن و دەستبەسەر و دواتر لە لایەن ئاسایشەوە سووکایەتییان پێ کراوە و لێیان دراوە، بەڵام تاکوو ئێستا ووردەکارى زیاتر لە لایەن خودى کۆمەڵە و بەرپرسەکانییەوە ئاشکرا نەکراوە .

شایەنى باسە دەمێک ساڵە کە لە باشوورى کوردستانەوە ڕێگرى لە چالاکى و چوونەوە نیشتمانى پێشمەرگەکانى حیزبەکانى ڕۆژهەڵاتى کوردستان دەکرێت و چەندین جاریش بەدەر لە ڕێگەگرتن، دەستبەسەرکردن و چەککردن و سووکایەتى و لێدانیش بەرامبەر بە پێشمەرگەى ڕۆژهەڵات ئەنجام دراوە .

ئەم بابەتە 11983 جار خوێندراوەتەوە