پەیامی کورد       ...   تێڕوانینی نێچیرڤان بارزانی سەرۆکی هەرێمی کوردستان بۆ هەموو لایەنە سیاسییەکان بێ جیاوازییە

راوێژكاری سەرۆكی ھەرێمی كوردستان رایدەگەێنێت، سەردانی سەرۆكی ھەرێم بۆ لای لایەنەكان بۆ ئەوە بوو، كە لە ناوخۆی ھەرێم یەكڕیز و تەبا بن و سەقامگیریی سیاسیش لە ھەرێمدا دروست ببێت، كە ھەموو لایەنەكان ئەو ھەنگاوەی سەرۆكی ھەرێمی كوردستانیان بە گرینگ زانی و سەرۆكی ھەرێمیش بەردەوام دەبێت لە پەیوەندیكردن لەگەڵ ھەموو لایەنەكان.

زیرەك كەمال، ڕایگەیاند ، ھەڵبەت دیارە سەرۆكی ھەرێمی كوردستان لە ڕووی یاساییەوە سەرۆكی ئەم ووڵاتەیە و لایەنە سیاسییەكانیش بەشێكن لە پرۆسەی سیاسی و سەرۆكی ھەرێمی كوردستانیش خۆی بە بەرپرسیار دەزانێت بەرامبەر بە ھەموو حیزب و لایەنەكان و بە یەك چاو سەیری ھەموو لایەنەكان دەكات، كە لە چەندین دیمانە و چاوپێكەوتن باسی لەوە كردووە، بۆ سەرخستنی پرۆسەی سیاسی و راستەڕێكردنی پرۆسەی سیاسی و سەقامگیری سیاسی، پێویستمان بە ھەماھەنگی و ھاوكاری ھەموو لایەنەكان ھەیە، بۆیە سەرۆكی ھەرێمی كوردستان كە سەردانی لایەنەكانی كردووە، تەئكیدكردنەوە بووە لە یەكڕیزی و یەك ووتاری و ھەماھەنگی و پێكەوەكاركردن و پێكەوە داڕشتنی ووتاری سیاسی لەسەر بەرژوەندی باڵای ھەرێمی كوردستان.

كەمال ووتیشی، سەردانی سەرۆكی ھەرێمی كوردستان بە حوكمی ئەوەی سەرۆكی ووڵاتە و خۆی بە بەرپرسیار دەزانێت، بۆ چەند مەبەستێكە، كە بریتین لە درووستبوونی یەكڕیزیی ناوماڵی كوردی و دروستبوونی سەقامگیریی سیاسی لە ھەرێمی كوردستان و پێكەوەكاركردن بۆ بەرگریكردن لە بەرژوەندییە باڵاكانی كوردستان.

دەشڵێ: "ئەوەی لەسەر شانی سەرۆكی ھەرێم بووە جێبەجێی كردووە، ئەوەی دیكە لای حیزبەكان دەمێنێتەوە، بەڵام ئەوەی ئێمە تێبینیمان كردووە لە راگەێندراوەكانی حیزبەكان، دوای سەردانی سەرۆكی ھەرێم دڵخۆشی خۆیان نیشان داوە و بە مایەی تەبایی و گرینگیان وەسف كردووە و پێشوازییان لەو ھەنگاوە كردووە و بە كارێكی باش و ھەنگاوێكی باشیان زانیوە سەرۆكی ھەرێمی كوردستان ئەنجامی داوە".

ڕاوێژكاری سەرۆكی ھەرێمی كوردستان باسی لەوەش كرد، سەرۆكی ھەرێمی كوردستان سەردانی ھەموولایەنەكانی كردووە، ئەوەی كوردستانی بێت و جگە لەوەش، سەردانی هەموو پێكھاتەكانیشی كردووە و بەردەوامیش دەبێت لە وەرگرتنی رای لایەنەكان بۆ پرسی سیاسی و لەبارەی عێراق و ناوچەكە و، پەیوەندیی بەردەوامیشی لەگەڵ لایەنەكاندا دەبێت و تەنھا ئەو سەردانە نابێت، بۆیە دەیەوێت بەردەوام لەگەڵ ھەموو لایەنەكان لە پەیوەندیدا بێت.

ئەم بابەتە 11988 جار خوێندراوەتەوە