پەیامی کورد   ...   تەقینەوەیەکی بەهێز ڕۆژئاوای کوردستانی هەژاند

بەرەبەیانی ئەمڕۆ دووشەممە لە شاری قامیشلۆی رۆژئاوای کوردستان ئۆتۆمبێلێکی سەر بە دەستەی پەروەردەی ئیدارەی خۆسەری تەقییەوە، لە ئەنجامیش دا شۆفێری ئۆتۆمبێلەکە برینداربوە و گەیندراوەتە نەخۆشخانە.

ئاژانسی هەواڵی باکوور (NPA) بڵاویکردەوە، بەیانی ئەمڕۆ ئۆتۆمبێلێکی سەر بە دەستەی پەروەردە لە ئیدارەی خۆسەری باکوور و رۆژهەڵاتی سووریا تەقییەوە و لە ئەنجامدا شۆفێرەکەی برینداربوە، هەروەها زیانێکی زۆریش بەر ئۆتۆمبێلەکە و ئەو ئۆتۆمبێلانەش کەوتووە کە لە شوێنی رووداوەکە نزیک بوون.

ئاماژەی بەوەش کردوە، لەئێستادا شۆفێری ئۆتۆمبێلەکە بۆ نەخۆشخانە گوازراوەتەوە و تەندرووستی قامیشلۆش جەختیکردوەتەوە کە تەندرووستی جێگیرە.

تائێستا هێزەکانی پاراستنی ناوخۆ (ئاسایش) لە رۆژئاوای کوردستان هیچ روونکردنەوەیان لەبارەی تەقینەوەکە بڵاونەکردوەتەوە، چاوەڕێش دەکرێت لە چەند کاتژمێری داهاتوو روونکردنەوەی فەرمی لەلایەن ئاسایشەوە بڵاوبکرێتەوە.