تەنیا چەند هەفتەیەک دوای ئەوەی وەزارەتی تەندرووستی ئێران رایگەیاند، واکسینی فایزەر هاوردە دەکرێ و ژنانی دووگیانی پێدەکوترێن، ئێستا دەڵێت، ئەو جۆرە واکسینە هاوردە ناکرێ و دەبێت ژنانی دووگیانیش واکسینی جۆری سینۆفارمی چینی وەربگرن.

وەزارەتی تەندرووستی ئێران ئەمڕۆ چوارشەممە 29-9-2021 بڵاویکردەوە، لیژنەی نیشتمانی پێکوتەی کۆرۆنا بەو ئەنجامە گەیشتووە کە ژنانی دووگیان واکسینی سینۆفارم وەربگرن و هەربۆیەش "بڕیارێک بۆ هاوردەی واکسینی فایزەر لە ئارادا نییە".

موحەممەدرەزا شانەساز، سەرۆکی رێکخراوی دەرمان و خۆراکی ئێران رۆژی 16-8-2021 رایگەیاند، مووڵەت دراوە پێکوتەکانی فایزەر و مۆدێرنا هاوردە بکرێن.

بەهرام عەینۆڵڵاهی، وەزیری تەندرووستی ئێران رۆژی 24-9-2021 لە شاری دێلۆران لە رۆژهەڵاتی کوردستان بە رۆژنامەڤانانی گوت، پێکوتەی فایزەر بەشێوەیەکی سنووردار و بۆ ژنانی دووگیان هاوردە دەکرێ.

عەلیڕەزا رەئیسی، ووتەبێژی وەزارەتی تەندرووستی ئێران رۆژی 25-9-2021 گوتی، داوا تۆمار کراوە بۆئەوەی ٢ ملیۆن و ٤٠٠ هەزار دۆز واکسینی فایزەر و ٥ ملیۆن واکسینی جانسن ئەند جانسن هاوردە بکرێت.

ئەو داوایە دوای ئەوە هات کە بەهۆی خراپتربوونی دۆخی کۆرۆناوە لە ئێران، عەلی خامنەیی، رابەری کۆماری ئیسلامی ئێران رۆژی 11-8-2021 داوایکرد بە هەر رێگەیەک دەگونجێت واکسین دابینبکرێت.

لە کاتێکدا پێشتر رابەری ئێران لە رۆژی 8-1-2021  هاوردەکردنی واکسینی ئەمریکی و بەریتانی قەدەخە کردبوو.