پەیامی کورد     ...   دابەشکردنی مووچەی خانەنشینانی سنووری دھۆک بەم شێوازە گۆڕانکاری بەسەردادێت

لە پارێزگای دھۆک ٢٤ ھەزار خانەنشین ھەیە و بەڕێوبەری خانەنشینی دھۆک دەڵێت، دابەشکردنی مووچەی خانەنشینانی سنووری دھۆک دەکرێتە ئەلیکترۆنی و لە رێگەی کارتەوە دەبێت.

ئاراس محەمەد، بەڕێوبەری خانەنشینی دھۆک، راگەیاند: "لە سنووری پارێزگای دھۆک نزیکەی ٢٤ ھەزار خانەنشین ھەیە و زۆر جار بەھۆی ئەوەی ژمارەیەکی زۆری خانەنشنین لەسەر یەک بانکن، لە کاتی دابەشکردنی مووچەدا کێشە و قەرەباڵغی پەیدا دەبێت، بەڵام ئێمە پلانێکمان ھەیە بۆ ئەوەی دابەشکردنی مووچەی خانەنشینی بە سیستەمێکی نوێ بێت."

بەڕێوبەری خانەنشینی دھۆک گوتی: "پلانەکەی ئێمە ئەوەیە سیستەمی دابەشکردنی مووچەی خانەنشینی بە شێوەی ئەلیکترۆنی بێت و بکرێتە کارت، واتە ئەو کارتەی لە پلانی ئێمەدایە بۆ مووچەی خانەنشینی مەرج تەنیا بۆ وەرگرتنی مووچە بەکار بێت، بەڵکوو دەتوانن لە بازاڕیش ئەو کارتە بەکار بێنن.''

ئاراس موحەمەد ئاماژەی بۆ ئەوە کرد: "بە سیستەمکردنی مووچەی خانەنشینی ھەنگاوێکی گرینگە، چوونکە لە ھەموو ھەرێمی کوردستان بەھۆی بارگرانی لەسەر ھەندێ بانک ئاستەنگ بۆ مووچەی خانەنشینان پەیدا دەبێت، بەڵام دوای کەوتنە کاری سیستەمی نوێ کە ئێمە خەریکی کارکردنین تێیدا ئاسانکاری زۆر دەکرێت لە دابەشکردنی مووچەی خانەنشینی."

ئەم بابەتە 11990 جار خوێندراوەتەوە