عەلی حەمە ساڵح، ئەندامی پەرلەمانی کوردستان لە فراکسیۆنی گۆڕان لە لاپەرەی تایبەتی خۆی لە فەیسبووک نووسیویەتی: دوو ساڵ بەبەردەوامی باسی قاچاخمان دەکرد ڕەتیان دەکردەوە و فشاری زۆریان دەکرد و تەنانەت دراینە دادگاش، ئێستا خۆیان وەک تاوان باسی دەکەن، ھیوادارم بە کردار ڕایبگرن و بەدڵنیایی ھەرکەس حاکم بێت چاودێرێکی جیددی دەبین.

ئەو پەرلەمانتارە ئاشکرای دەکات: ئێستا فڕۆکەخانە باشە، دوێنێ شەو بەدواداچوونی کردووە و  باشماخیش کەمی کردووە، بەڵام تەواو ڕانەگیراوە.

ناوبراو دەشڵێت: ئێستا ناتوانین حوکمی تەواو بدەین و دوو بۆ سێ حەفتەی دیکە زیاتر ئاشکرا دەبێت.

سەبارەت بە ڕاگرتنی قاچاخ و کاری قاچاخچیەتی عەلی حەمە ساڵح نووسیویەتی: ناتوانم گەرەنتی بدەم ڕادەگیرێت، بەڵام گەرەنتی ئەوە دەدەم ھەرکەس بیکات بەجیددی بەرھەڵستی دەکەین.