پەیامی کورد      ...    دوای پەسەند کردنی پڕۆژە یسای بوودجە نرخی خانووبەرە بە شێوەیەکی بەرچاو بەرزدەبێتەوە

ووتەبێژی یەکیتی وەبەرهێنەرانی هەرێمی كوردستان دەڵێت، لە دوای پەسەندكرنی پڕۆژەیاسای بودجە، جموجۆڵی بازاڕ و گەشەی ئابووری لە بازاڕەكانی كوردستان زیادی كردووە،‌ بە شێوەیەك كە تەنها لە ماوەی دوو ڕۆژی ڕابردوودا، نرخی یەكەكانی نیشتەجێبوون نزیكەی ٢٠% بەرز بووەتەوە.

مەلا یاسین مەحموود، ووتەبێژی یەکیتی وەبەرهێنەرانی هەرێمی كوردستان ڕایگەیاند: "كەرتی خانووبەرەی هەرێمی كوردستان لە ئێستادا بەراورد بە ڕابردوو، كەرتێكی ئەكتیڤە، بە هۆی ئەو سیاسەتە درووستەی كە كابینەی نۆیەم گرتوویەتیە بەر، كە وای كردووە گەشەیەكی هەستپێكراو لە تەواوی سێكتەرەكانی وەك پیشەسازی، كشتوكاڵ و ژینگە ببینرێت، دواهەمین سێكتەریش كە لە دوو ڕۆژی ڕابردوودا و بە تایبەت لە دوای پەسەندكرنی پشكی هەرێم بووژانەوەی گەورەی بەخۆوە بینی، كەرتی خانووبەرە بوو، بە شێوەیەك نرخەكان ١٠% بۆ ٢٠% بەرزبوونەوەیان تۆمار كردووە، كە بێگومان لە دوای كەوتنە بواری جێبەجێكردنی بوودجەی عێراق و ناردنی پشكی هەرێم، لیڤڵ و گەشەی خانووبەرە دەچێتە ئاستێكی زۆر بەرزترەوە".

مەحموود گوتیشی: "ئەو جووڵە بازرگانییەی كە ئێستا لە بازاڕەكانی كوردستان هەیە، ئەو جووڵە نییە كە چەند ڕۆژێك پێش پەسەندكرنی بوودجە هەبوو، بازاڕی ئازاد و بوونی سەقامگیری و ئاسایش، هەروەها متمانەی سەرمایەداران و وەبەرهێنەران بە بازاڕەكانی ئێمە، وای كردووە چەندین گەورەوەبەرهێنەر و خاوەن براندە گەورەكان، لقی سەرەكییان لە كوردستان بكەنەوە، بۆ نموونە كۆمپانیا هەیە  لە جیهاندا ٨٠ لقی هەیە، بەڵام ناوەندی سەرەكیی كۆمپانیاكە، لە هەرێمی كوردستانە".

ووتەبێژی یەكیتی وەبەرهێنەرانی هەرێمی كوردستان دەشڵێت: "چاوەڕوان دەكرێت گەشەی ئابووری لە كەرتی خانووبەرەی هەرێم بگاتە ئاستێك، تەنانەت هاووڵاتیانی ووڵاتانی دراوسێی كوردستان و ئەورووپاش بیر لەوە بكەنەوە دەست بە كڕینی یەكە نیشتەجێبوون و زەوی بكەنەوە، بە مەرجێك ئەو سیاسەتەی كە ئێستا حكوومەتی هەرێم لەسەری دەڕوات، بەردەوام بێت، بە تایبەت چاكسازی و بووژانەوەی بازاڕ و سەرمایەگوزاری لە كوردستان".

روونیشی كردەوە: "دڵنیایی ئەوە دەدەم، كە ساڵی داهاتوو ئێمە وەك هەرێمی كوردستان چیتر پێوستمان بەوە نابێت شاند بنێرێتە بەغدا و دانووستان بۆ بوودجە و مووچە بكەین، بەڵكوو هاوكێشەكە تەواو پێچەوانە دەبێتەوە".

ئەم بابەتە 11992 جار خوێندراوەتەوە