دووەمین بەرهەمهێنەری سەرچاوەی ووزەی نەوت و گازی ئێران ، گازی نییە
پەیامی کورد ... دووەمین بەرهەمهێنەری سەرچاوەی ووزەی نەوت و گازی ئێران ، گازی نییە
بەڕێوبەری گشتی گازی ئێران لە پارێزگای ئیلام ڕایگەیاندووە، هەتا ئێستا بۆ هەموو شار و گوندەکانی ئەو پارێزگایە گاز ڕانەکێشراوە.
''عەباس شەمسۆڵڵاهی'' ڕۆژی پێنجشەممە ٥ی ئۆگۆست، لە وتووێژێک لەگەڵ یەکێک لە ئاژانسە هەواڵییەکانی ناوخۆی ئێران وتوویەتی، شاری ''پەڵە'' سەر بە شارۆچکەی دێهلۆران هەتا ئێستا گازی بۆ ڕانەکێشراوە.
ئەو بەرپرسەی ڕێژیم لە پارێزگای ئیلام پێشتر ووتبووی کە زیاتر لە ١٨٠ یەکەی بەرهەمهێنان و پیشەیی لەو پارێزگایە گازیان بۆ نەچووە.
پارێزگای ئیلام خاوەنی زیاتر لە ١١ لەسەدی سەرچاوەی نەوت و گازی ئێرانە، بە واتایەکی دیکە ١٤ تریلیۆن میتری چوارگۆشە گاز و ١٧ میلیارد بەرمیل پاشەکەوتی نەوتی لەخۆ دەگرێت.
پارێزگای ئیلام کە دووەمین بەرهەمهێنەری سەرچاوەی نەوت و گازی ئێرانە بۆ ماوەی زیاتر لە ٤ دەیەیە سەرچاوەکانی لەلایەن ئێرانەوە بەکار دەهێنرێت، لە حاڵێکدا زۆرێک لە شار و گوندەکانی ئەو پارێزگایەی کوردستانی ڕۆژهەڵات لە نەوت و گاز بێ بەری کراون.
ئەم بابەتە 11990 جار خوێندراوەتەوە