پەیامی کورد     ...   دوو ڕێکاری گرینگ بۆ بەرگری لە کۆرۆنا ئاشکرا دەکرێت

ووتەبێژی وەزارەتی تەندرووستی حکوومەتی ھەرێمی کوردستان ئاشکرای کرد، بۆ ئەوەی بتوانین رێگری بکەین لە نەخۆشی کۆرۆنا و زیادبوونی حاڵەتەکانی ئەو نەخۆشییە و خۆپاراستن لێی، کە ماوەی چەند رۆژێکە لە زیادبووندایە، دوو رێگا ھەیە، ئەوانیش خۆپارێزی و پابەندبوون بە رێنماییەکان و، هەروەها خۆتۆمارکردن و وەرگرتنی ڤاکسینە.

دکتۆر ئاسۆ حەوێزی، ووتی، ماوەی چەند رۆژێکە حاڵەتەکانی نەخۆشی کۆرۆنا لە ھەرێمی کوردستان زۆر زیاد بوون بەراورد بە ماوەی ڕابردوو و، حاڵەتەکان دەگاتە نزیکەی ھەزار حاڵەت، بۆیە پێویستە ھاووڵاتیان ئاگادار بن و رێکارەکانی پێویست بۆ رێگریکردن لە زیادبوونی حاڵەتەکان و نەھێشتنی ئەو نەخۆشییە بگرنە بەر.

ووتەبێژی وەزارەتی تەندرووستی گوتیشی، دوو رێگا ھەیە کە پێویستە کار بکرێت بۆ ئەوەی بتوانین رێگری لە نەخۆشی کۆرۆنا بکەین و رێگە نەدەین زیاد بێت، چوونکە کۆرۆنا خۆی ھێشتا ماوە و تەواو نەبووە، بەڵام حاڵەتەکان کەم ببوون، کەچی بەداخەوە ئێستا جارێکی دیکە لەو چەند ڕۆژەدا بەراورد بە ماوەی ڕابردوو، حاڵەتەکان زیاد بوون.

حەوێزی باسی لەوەش کرد، دوو رێگا ھەیە بۆ رێگریکردن و خۆپاراستن لە نەخۆشی کۆرۆنا، ئەوانیش خۆپارێزی و جێبەجێکردنی رێنماییەکان، لەوانە بەستنی ماسک و دوورکەوتنەوە لە خەڵک و، رێگای دووەمیش وەرگرتنی ڤاکسینە، کە ئەوەش زۆر گرینگە بۆ ئەوەی پارێزراو بین و ناوی خۆمان تۆمار بکەین، بۆ ئەوەی ڤاکسین وەربگرین، ھەر چەندە خەڵک بەردەوام ناوی تۆمار دەکات، بەڵام پێویستە زیاتر بێت، چوونکە تا ئێستا زیاتر لە ٢٠٠ھەزار کەس ناوی بۆ وەرگرتنی ڤاکسین تۆمار کردووە، بەڵام ئێمە خواستمان زیاترە و داوا دەکەین ھاووڵاتیان زیاتر خۆیان تۆمار بکەن، چوونکە ئەوە فاکتەرێکە بۆ ئەوەی لە نەخۆشیی کۆرۆنا پارێزراو بین.

ئەم بابەتە 11992 جار خوێندراوەتەوە