پەیامی کورد     ...     دەزگای هەواڵگری ئێران  :  تیمێکی سیخوڕی دەزگای هەواڵگری و سیخۆڕی مووساد مان لە ناوخۆی ئێران دەست بەسەر کردووە

بەڕێوبەری گشتی دژە سیخوڕی وەزارەتی ئیتلاعاتی ئێران رایگەیاند، توانیویانە تیمێکی سیخوڕی مووساد دەستگیربکەن کە ژمارەیەک چەک و تەقەمەنیان پێبوە و ئامانجیان بوە کاری تێکدەری لە ئێراندا ئەنجامبدەن.

بەپێی هەواڵی ئاژانسی میهر ی ئێران ، ئەمڕۆ سێشەممە بەڕێوبەری گشتی دژەسیخوڕی وەزارەتی ئیتلاعاتی رایگەیاندوە، "دوای ئەوەی لە سنوورەکانی ئەو ووڵاتەوە چالاکییەکانی تیمێکی گوماناویان کۆنتڕۆڵکردوە، ئاشکرابووە ئەو تیمە، تیمێکی سیخوڕییە و لە لایەن مووسادی ئیسرائیلەوە نێردراوەتە نێو سنووری ڕۆژئاوای ئێران کە چەک و تەقەمەنیان پێبوە".

ئاماژە بەوەشکراوە، ئەو تیمەی مووساد پلانی داڕشتوە کە کاری تیرۆر و ئاژەوەگێڕی لە چەند ناوچەیەکی ووڵاتدا ئەنجامبدات، بەڵام بە دەستپێشخەری هێزە ئەمنییەکان لەکاتی خۆیدا توانراوە ئەو گرووپە دەستگیربکرێت و رێگری لە کاری تیرۆریستی بکرێت کە بەسەرپەرشتی مووساد پلانی بۆ دانراوە.

بەپێی ناوەندی راگەیاندنی وەزارەتی ئیتلاعات " هەواڵگری " ئێران وەزارەتی ئیتلاعات، هەموو ئەندامانی ئەو تیمە دەست بەسەرکراون و تەواوی ئەو چەک و تەقەمەنیەی هێناویانەتە ووڵاتەکەوە دەستی بەسەردا گیراوە کە ئامانجیان بوە لە کاتی درووستبوونی ناڕەزایەتی لە ئێراندا بەکاریبهێنن، کە پێکهاتوون لە دەمانچە و نارنجۆک و کڵاشینکۆف.
 
ئەوەش لەکاتێکدایە چەند هەفتەیەکە دوای ئەوەی لە پارێزگای خوزستانی ئێران بەهۆی کەم ئاوی و بێ کارەبایی خۆپیشاندانی ناڕەزایی دەستیپێکردوە دوێنێ دووشەممەش بەشێک لە دانیشتوانی تاران رژانە سەر شەقام و ناڕەزاییان بەهۆی کەمی ئاو و کارەبا دەربڕی.

ئەم بابەتە 11985 جار خوێندراوەتەوە