سه‌رۆكى هه‌رێمى كوردستان، پێشوازى له هونه‌رمه‌ندى ناودارى كورد شه‌هرام نازرى ده‌كات
پەیامی کورد ... سه‌رۆكى هه‌رێمى كوردستان، پێشوازى له هونه‌رمه‌ندى ناودارى كورد شه‌هرام نازرى ده‌كات
ئه‌مڕۆ چوارشه‌ممه 2022/5/18 نێچیرڤان بارزانى، سه‌رۆكى هه‌رێمى كوردستان، پێشوازى له هونه‌رمه‌ندى ناودارى كورد شه‌هرامى نازرى كرد كه ماوه‌یه‌كه به سه‌ردان له هه‌رێمى كوردستانه و پێرێ دووشه‌ممه له ڕێوڕه‌سمێكى ڕێزلێناندا خه‌ڵاتى ئاڵتوونی وه‌زاره‌تى ڕۆشنبیریى حكوومه‌تى هه‌رێمى كوردستانى پێ به‌خشرا.
سه‌رۆك نێچیرڤان بارزانى، وێڕاى ده‌ربڕینى خۆشحاڵى به دیدارى مامۆستا نازرى، ڕێز و ستایش و پێزانینى بۆ مێژوو و خزمه‌ت و كار و به‌رهه‌مه هونه‌رییه‌كانى دووپات كرده‌وه و پێگه و ناوبانگى مامۆستا نازرى له‌سه‌ر ئاستى ناوچه‌كه و جیهان و ئه‌و خه‌ڵاته نێوده‌وڵه‌تییانه‌ى به ده‌ستى هێناون، به مایه‌ى شانازى بۆ هه‌موو كوردێك و خه‌ڵكى كوردستان به‌گشتى له قه‌ڵه‌م دا. هەروەها وێڕاى دووپاتكردنه‌وه‌ى هه‌موو پشتگیرییه‌ك بۆ مامۆستا نازرى، هیواى ته‌مه‌نى درێژ و ته‌ندرووستی باش و سه‌ركه‌وتنى به‌رده‌وامى بۆ خواست.
لاى خۆیه‌وه شه‌هرامى نازرى وێڕاى سوپاس و پێزانین بۆ سه‌رۆك نێچیرڤان بارزانى و ئه‌و ڕێزلێنان و خه‌ڵاتكردنه‌ى له هه‌رێمى كوردستان لێى كراوه، دووپاتى كرده‌وه كه ڕێزلێنان و خه‌ڵاتكردنى له كوردستان، لاى ئه‌و له هه‌موو ئه‌و ڕێزلێنان و خه‌ڵاته نێوده‌وڵه‌تییانه زیاتر مایه‌ى شادى و مانادارتر و به‌هادارتره كه له‌سه‌ر ئاستى جیهان پێشكه‌شى كراون و خۆشحاڵی خۆى به سه‌ردانى هه‌رێمى كوردستان و دیدارى له‌گه‌ڵ سه‌رۆك نێچیرڤان بارزانى نیشان دا.
له دیداره‌كه‌دا به‌ڕێزان وه‌زیرى ڕۆشنبیرى و بریكارى وه‌زاره‌تى ڕۆشنبیریى حكوومه‌تى هه‌رێمى كوردستان، ئاماده بوون.
ئەم بابەتە 11988 جار خوێندراوەتەوە