سەبارەت بە پڕۆژەکانی هەڵەبجە سه‌رۆکى ده‌سته‌ى وه‌به‌رهێنانى حکوومه‌تى هه‌رێمى کوردستان زانیاری گرینگ دەخاتە ڕوو
پەیامی کورد ... سەبارەت بە پڕۆژەکانی هەڵەبجە سه‌رۆکى ده‌سته‌ى وه‌به‌رهێنانى حکوومه‌تى هه‌رێمى کوردستان زانیاری گرینگ دەخاتە ڕوو
سه‌رۆکى ده‌سته‌ى وه‌به‌رهێنانى حکوومه‌تى هه‌رێمى کوردستان، زانیاری گرینگ ده‌رباره‌ى ئه‌و پرۆژانه ده‌خاته ڕوو که له پارێزگاى هه‌ڵەبجه مووڵەتیان پێ دراوه و ده‌ڵێت، ئێستا نزیکه‌ى ٢٥ پرۆژه‌ى وه‌به‌رهێنانی بواره جۆربه‌جۆره‌کان (کشتوکاڵ، پیشه‌سازى، ئاژه‌ڵدارى) له قۆناغى جێبه‌جێکردندان، ئه‌وه‌ى گرنگه ناوچه‌ى پیشه‌سازیى هه‌ڵەبجه‌یه که له سه‌ر ڕووبه‌رى ٤٠٠ دۆنم زه‌وى جێبه‌جێ ده‌کرێت که نزیکه‌ى ٤٠ بۆ ٥٠ کارگه له خۆ ده‌گرێت و ته‌واوبوونیان ڕۆڵى گه‌وره‌ی لە پاراستنى ئاسایشى خۆراکی ناوخۆ دەبێت و هاوکات ده‌بێته سه‌به‌ته‌یه‌کى گرنکى خۆراکى ناوچه‌کەش.
د. موحه‌مه‌‌د شوکرى، سه‌رۆکى ده‌سته‌ى وه‌به‌رهێنانى حکوومه‌تى هه‌رێمى کوردستان، ڕایگه‌یاند: "له ساڵى ٢٠٢٠ مۆڵه‌تمان به ٢٥ پرۆژه‌ى زۆرباشى وه‌به‌رهێنان له سنوورى پارێزگاى هه‌ڵەبجه داوه که به‌شێکى زۆریان پرۆژه‌ى کشتوکاڵین و پرۆژه‌ى ئاژه‌ڵدارى که ژماره‌یان سێ پرۆژه‌یه، بۆ پرۆژه‌ى گه‌نجینه‌کانى ساردکه‌ره‌وه بۆ هه‌ڵگرتنى به‌ربوومه‌کانیش ڕه‌زامه‌ندیمان نیشان داوه، به شێوه‌یه‌کى گشتى ئه‌وه‌ى له پلانى وه‌زاره‌ت و ڕێبه‌رى پلاندانانه نزیکه‌ى ١٥٠ پرۆژه‌ى تر بۆ پارێزگاى هه‌ڵه‌بجه دانراوه و قۆناغ به قۆناغ کاریان له‌سه‌ر ده‌کرێت، به‌ده‌ر له هه‌موو ئه‌مانه کۆنفرانسێکى تایبه‌ت به وه‌به‌رهێنان له چه‌ند مانگى داهاتوو به هاوکاریى په‌رله‌مان و پارێزگاى هه‌ڵه‌بجه ساز ده‌کرێت که ئامانج لێى ڕاکێشانى ده‌ستى وه‌به‌رهێنه‌ره‌کان و به‌گه‌ڕخستنى سه‌رمایه‌کانیانه له پارێزگاکه".
ناوبراو ئه‌وه‌شى خسته ڕوو: "کارگه‌کان هه‌مه‌جۆرن، وه‌ک کارگه‌ى درووستکردنى به‌رهه‌مى قوتووبه‌ندى و، کارگه‌ى درووستکردنى شه‌ربه‌ت و خۆراک که ته‌واوى جۆره‌کانى خۆراکى لێ درووست ده‌کرێت، ئه‌مه‌ش گومانى تێدا نییه ده‌بێته سه‌به‌ته‌ى خۆراکى بۆ کوردستان و عێراق و پاراستنى ئاسایشى خۆراک، ژینگه‌ى هه‌ڵه‌بجه و شاره‌زوور به حوکمى بوونى سه‌رچاوه‌ى ئاو و گونجاوی که‌شوهه‌وا و به‌پیتیى خاکه‌که‌ى گرنگه، به‌تایبه‌ت ئه‌گه‌ر بێت و کار له‌سه‌ر گۆڕینى سیفه‌تى زه‌وییه‌کان و شێوه‌ى کشتوکاڵى بکرێت به مه‌به‌ستى به‌رهه‌مى زیاتر و پرۆژه‌ى کشتوکاڵی جۆراوجۆر."
ووتیشى: "بێگومان که‌وتنه کارى ئه‌م پرۆژانه پێوستى به ده‌ستى کار و شاره‌زاى بواره جیاوازه‌کان هه‌یه، کاریگه‌ری گه‌روه‌یشى له که‌مکرنه‌وه‌ى بێکارى هه‌یه، چوونکه مه‌رجى سه‌ره‌کى بۆ به‌رده‌وامی هه‌ر پرۆژه‌یه‌ک بوونى ده‌ستى کاره، ئێمه دامان ناوه له هه‌ربه‌شێکى ئه‌و پرۆژانه سوود له توانا و لێهاتووییى خه‌ڵکى هه‌ڵه‌بجه وه‌ربگیرێت، مه‌گه‌ر له حاڵێکدا پرۆژه‌یه‌ک پێوستى به جۆرێک له شاره‌زایى هه‌بێت که له پارێزگاکه نه‌بێت، ئه‌وکات په‌نا ببرێته به‌ر ده‌ستى کارى ده‌روه‌ى سنووره‌که.''
سه‌رۆکى ده‌سته‌ى گشتی وه‌به‌رهێنانى هه‌رێمى کوردستان زانیاری زیاترى ڕوون کردووه و ووتى: "به‌رنامه‌یه‌کى تایبه‌تمان بۆ پارێزگاى هه‌ڵەبجه ده‌بێت و له ماوه‌یه‌کى نزیکدا سه‌ردانى پارێزگاکه ده‌که‌ن و ووردکارى و کۆى پرۆژه‌کان بۆ هاووڵاتییان و خه‌ڵکى خۆشەویستى هه‌ڵەبجه ڕوون ده‌که‌ینه‌وه، به خۆشحاڵى و سوپاسى زۆره‌وه بۆ به‌رپرسانى یه‌که ئیدارییه‌کان که هاوکارمان بوون بۆ خستنه بوارى جێبه‌جێکردنى ئه‌م پرۆژانه، به‌تایبه‌ت خودى پارێزگار".
ئەم بابەتە 11991 جار خوێندراوەتەوە