سەبارەت بە گۆرینی سەرۆکی هاوپەیمانییەتییەکان کۆمیسیۆنی باڵای هەڵبژاردنەکان ڕوونکردنەوەیەک بڵاو دەکاتەوە
پەیامی کورد ... سەبارەت بە گۆرینی سەرۆکی هاوپەیمانییەتییەکان کۆمیسیۆنی باڵای هەڵبژاردنەکان ڕوونکردنەوەیەک بڵاو دەکاتەوە
بەڕێوبەری گشتی فەرمانگەی پارتەسیاسییەکان لە کۆمیسیۆنی باڵای سەربەخۆی هەڵبژاردنەکانی عێراق دەربارەی گۆڕینی سەرۆکی هاوپەیمانێتیەکان روونکردنەوەی دا و رایگەیاند، تا ئێستا بەفەرمی بەڕەوتی سەدریشەوە داوای کشانەوەی لە هەڵبژاردنەکان پێشکەش بە کۆمیسیۆن نەکردوە، بەڵام ئەگەر داوا پێشکەش بکرێت و هیچ رێگرییەکی یاسایی نەبێت پەسەند دەکرێت.
هیمان تەحسین بەگ بەڕێوبەری گشتی لەفەرمانگەی پارتەسیاسییەکان لە کۆمسیۆنی باڵای سەربەخۆی هەڵبژاردنەکانی عێراق دەڵێت" کۆمیسیۆن بەردەوامە لە ئامادەکارییەکان بۆ ئەنجامدانی هەڵبژاردنی پێشوەخنەی پەرلەمانی عێراق لە وادەی خۆیدا، هیچ لیست و لایەنێکیش تا ئێستا بەفەرمی بەڕەوتی سەدریشەوە داوای کشانەوەی لە هەڵبژاردنەکان پێشکەش بە کۆمسیۆن نەکردوە، دەربارەی گۆڕینی سەرۆکی هاوپەیمانیەتی لایەنەکان، بەتایبەت هاوپەیمانی کوردستانی، بەرپرسەکەی کۆمیسیۆن دەڵێت "هه‌تا ئه‌م ساته هیچ داواکاریه‌کمان پێشکه‌ش نه‌کراوه به‌ڵام ئه‌گه‌ر داواکاریمان پێشکه‌ش بکرێت له‌لایه‌نی ئه‌و پارته سیاسیانه‌ی که ئه‌و هاوپه‌یمانێتیه‌یان دروستکردووه له هه‌رێمی کوردستان ئێمه دراسه‌ی ئه‌و داواکارییه ده‌که‌ین ئه‌گه‌ر هیچ لاریه‌کی یاسایی نه‌بێت قبوڵی ده‌که‌ین."
لەبارەی میکانیزمی گۆڕینی سەرۆکی هاوپەیمانییەتییەکان رایگەیاند،" بێگومان ده‌بێت ڕه‌زامه‌ندی کۆمیسیۆن هه‌بێت به‌تایبه‌تی فه‌رمانگه‌ی کاروباری پارته سیاسیه‌کان بۆ گۆڕینی سه‌رۆکی هاوپه‌یمانیەتی پێویسته له‌و حیزبانه‌وه پێشکه‌ش بکرێت که ئه‌و هاوپه‌یمانێتیه‌یان درووستکردوه."
بەڕێوبەری گشتی لەفەرمانگەی پارتەسیاسییەکان لە کۆمیسیۆنی باڵای سەربەخۆی هەڵبژاردنەکانی عێراق ووتیشی" کۆمیسیۆنی باڵای هه‌ڵبژادنی عێراق سوره له‌سه‌ر ئه‌نجامدانی پرۆسه‌ی هه‌ڵبژاردن له‌کاتی خۆیدا که ڕۆژی 10-10-2021، هه‌مو ئاماده‌کاریه‌کمان لەوبارەیەوە کردوە."
دەربارەی بانگەشەی موقتەدا سەدر سەرۆکی ڕەوتی سەدر بۆ کشانەوەی ڕەوتەکەی لە هەڵبژاردنی پێش وەختەی پەرلەمانی عێراق، هیمان تەحسین بەگ وتی" به‌هیچ شێوه‌یه‌ک کاریگه‌ری نابێت وه‌ک پرۆسه، ئێمه وه‌ک کۆمیسیۆنی باڵای هه‌ڵبژادن به‌رده‌وامین له هه‌مو ئه‌و ڕێوشوێنانەی که پێویسته بۆ ئه‌نجامدانی پرۆسه‌ی هه‌ڵبژاردن، وه ئه‌گه‌ر هه‌ر لایه‌نێکیش بکشێته‌وه له‌م پرۆسه‌یه، ئه‌مه پرۆسه‌یه‌کی دیموکراتیه هه‌رکه‌سێک بیه‌وێت به‌شداری بکات یان هه‌رکه‌سێک بیه‌وێت بکشێته‌وه ئه‌وه شتێکی ئاساییه."
جەختیشیکردەوە" هه‌تا ئه‌م ساته به‌فه‌رمی هیچ لایه‌نێک نه ڕه‌وتی سه‌در نه لایه‌نێکی تر هیچ داواکاریه‌کیان پێشکه‌ش نه‌کردوه به فه‌رمانگه‌که‌ی ئێمه به‌ڵێ ته‌نانه‌ت ڕه‌وتی سه‌دریش به‌هیچ شێوه‌یه‌ک هه‌تا ئه‌م ساته به‌فه‌رمی هیچ داواکارییه‌ک پێشکه‌شی ئێمه نه‌کراوه."
ئەو بەرپرسەی کۆمیسیۆنی باڵای سەربەخۆی هەڵبژاردنەکانی عێراق ئاماژەی بەوەش کرد" ئێمه پێمان خۆشه وه‌ک کۆمیسیۆن هه‌موو لایه‌نه سیاسیه‌کان به‌شداربن له‌م پرۆسه‌یه چونکه ئه‌م پرۆسه‌یه نوێنه‌رایه‌تی هه‌موو خه‌ڵکی عێراق ده‌کات له باکوره‌وه هه‌تا باشور، به‌هیچ شێوه‌یه‌ک ئێمه له‌گه‌ڵ هیچ لایه‌نێک نیین و ئێمه بێلایه‌نین کۆمیسیۆنی باڵای هه‌ڵبژادنی عێراق بێلایه‌نه و هه‌رکه‌سێک بیه‌وێت به‌شداری بکات له‌م پرۆسه‌یه زۆر زۆر ئاساییه، وه هه‌رکه‌سێکیش بیه‌وێت بکشێته‌وه ئێمه به‌هیچ شێوه‌یه‌ک ده‌ستێوه‌ردانی ئه‌و شتانه ناکه‌ین."
ئەم بابەتە 11990 جار خوێندراوەتەوە