سەبارەت بە یه‌كلاكردنه‌وه‌ى پۆستى سه‌رۆككۆماری عێراق زانیاری نوێ ڕادەگەێنین
پەیامی کورد ... سەبارەت بە یه‌كلاكردنه‌وه‌ى پۆستى سه‌رۆككۆماری عێراق زانیاری نوێ ڕادەگەێنین
سەرۆکی کوتلەی بەدر له‌په‌رله‌مانى عێراق نوێترین زانیاریی له‌باره‌ى پێكهێنانى حكوومه‌تى نوێى عێراق ئاشكرا ده‌كات و ڕاشیده‌گه‌ینێت، دۆسیەی پێکھێنانی حکوومەتی نوێ لەگەڵ دەستپێکردنەوەی دانیشتنەکانی په‌رله‌مان یەکلا دەکرێتەوە،ده‌شڵێت:"یەکەم ھەنگاو بۆ یەکلاکردنەوەی دۆسیەکەش ھەڵبژاردنی سەرۆککۆمار دەبێت".
مەھدی تەقی سەرۆکی کوتلەی بەدر له‌په‌رله‌مانى عێراق ڕایگه‌یاند، گفتوگۆکان بەردەوامن بۆ یەکلاکردنەوەی دۆسیەی پێکھێنانی حکوومەت لەدوای جەژن و دوای کۆتاییھاتنی پشووی وەرزی یاسادانانی په‌رله‌مانیش‌و دەستپێکردنی وەرزی نوێ، دۆسیەکە یەکلادەکرێتەوە.
ئه‌وه‌شى ووت:"دوای جەژنی قوربان زنجیرەیەک کۆبوونەوەو دانوستانی چڕ لەنێوان لایەنە سیاسییەکاندا بەڕێوەدەچن بۆ یەکلاکردنەوەی دۆسیەی پێکھێنانی حکوومەت و یەکەم ھەنگاو بۆ یەکلاکردنەوەی دۆسیەکەش ھەڵبژاردنی سەرۆککۆمار دەبێت".
ئه‌مه‌ش له‌كاتێكدایه، سه‌عد مه‌تڵه‌بى سیاسەتمەداری سەربەخۆی عێراق ڕایگەیاند، نزیکترین سیناریۆ بۆ یەکلاییکردنەوەی پۆستی سەرۆککۆمار لەژێر سایەی بەردەوامی ململانێی نێوان یەکێتی و پارتی لەسەر پۆستی سەرۆککۆمار، بریتییە لەدوبارەبوونەوەی سیناریۆی ساڵی ٢٠١٨ لەناو پەرلەمانی عێراقدا.
سه‌ركرده شیعه‌كانیش ده‌ڵێن:"هۆكارى دره‌نگ پێكهێنانى حكوومه‌تى نوێى عێراق، یه‌كلانه‌كردنه‌وه‌ى پۆستى سه‌رۆككۆماره له نێوان پارتى‌و یه‌كێتیدا".
ئەم بابەتە 11991 جار خوێندراوەتەوە