پەیامی کورد   ...  سەركردەیەكی هێزەكانی ئەمریكا سەردانی سووریا دەکات

سوپای ئەمریكا ڕادەگەینێت سەركردەیەكی هێزەكانی ئەمریكا سەردانی سوریای كردووە و لەوێ چووەتە كەمپی هۆل و كەمپی ڕۆژ لە باكوور و ڕۆژهەڵاتی سووریا.
ناوەندی فەرماندەیی لەشكری ئەمریكا (CENTCOM) دەڵێت لە 21 ی مانگی هەشت ژەنەڕاڵ مایكڵ كوریلا ناسراو بە ئێرك ئەو گەشتەی ئەنجام داوە.
هەروەها دەشڵێت سەردانەكەی ئەو كەمپانە بە مەبەستی كۆبوونەوە بووە لەگەڵ بەڕێوبەرانی كەمپەكان و دانیشتوانیش " تا لە نزیكەوە هەڵسەنگاندن بكرێت بۆ بارودۆخی مرۆیی ئێستای كەمپەكان، باشتركردنی بەردەوامی ئاسایشی كەمپەكان و گێڕانەوەی خەڵكەكە بۆ ووڵاتی خۆیان و هاتنەوە سەرخۆ و هەوڵەكانی تێكەڵ كردنەوەیان بە كۆمەڵگە بۆ ئەوەی بیانگەڕێننەوە بۆ ووڵاتی خۆیان."
ژەنەڕاڵ كوریلا ووتی "هەوڵە بەردەوامە فرەنەتەوەییەكانمان بۆ گەڕاندنەوەی دانیشتوانی كەمپەكان بۆ ووڵاتانی خۆیان نەك تەنها ئاسایش و سەقامگیری ناوچەكە باشتردەكات، بەڵكوو لەوەش گرینگتر ئەم قەیرانە مرۆییە كەمتر دەكاتەوە." ووتیشی "ئەمریكا، هێزەكانی سووریای دیموكراتیك و هاوپەیمانی جیهانی سەرنجیان بەردەوامە لەسەر شكستی هەمیشەیی داعش، لە هەمان كاتدا ڕووبەڕووی ئاستەنگە مرۆیی و ئەمنییەكان دەبنەوە لە كەمپەكانی باكوور و ڕۆژهەڵاتی سووریا."
بەپێی راپۆرتی دەنگی ئەمریكا، لە باكوور و ڕۆژهەڵاتی سووریا زیاتر لە٥٧ هەزار ژن و منداڵی بنەماڵەكانی داعش هەن كە لە كەمپ و ناوەندەكانی دەستبەسەركردندا دانراون، لەسەدا ٦٥یان منداڵن كە ٣٧ هەزار كەسی بیانی لە ٦٠ ووڵاتی جیاوازەوە هاتوون.
بەپێی ئامارە فەرمییەكان، لە سەرەتای ساڵی ٢٠٢٢ تا كاتی ئامادەكردنی ئەم ڕاپۆرتە، ٨٨٧ منداڵ و ژنی داعش ڕادەستی ووڵاتەكانیان كراون كە ٦٦٧یان منداڵن.
پرۆسەی گەڕانەوەی ئەو خەڵكە زۆر خاوە و بووەتە نیگەرانی بۆ هێزە كوردییەكانی كە ناوچەكە بەڕێوە دەبەن. نەتەوە یەكگرتووەكانیش چەندین جار داوای لە ووڵاتان كردووە هاووڵاتیانی خۆیان بگێڕنەوە بۆ وڵاتەكانیان.