پەیامی کورد   ...  سەرۆكی هەرێمی كوردستان پێشوازی لە باڵیۆزی نوێی یەكیتی ئەورووپا کرد

پاشنیوەڕۆی ئەمڕۆ چوارشەممە 11/10/2023 نێچیرڤان بارزانی، سەرۆكی هەرێمی كوردستان، پێشوازی لە تۆماس سیله‌ر باڵیۆزی نوێی یه‌کیتی ئه‌ورووپا له‌ عێراق و شاندێكی یاوەری كرد.

لە دیدارێكدا سەرۆك نێچیرڤان بارزانی پیرۆزبایی دەستبەكاربوونی لە سیلەر وەك باڵیۆزی نوێی یەكیتی ئەورووپا لە عێراق كرد و هیوای سەركەوتنی لە كار و ئەركی نوێیدا بۆ خواست، هه‌روه‌ها پشتگیری هەرێمی كوردستانی بۆ كار و چالاكییەكانی و هه‌ماهه‌نگی لەگەڵ یەكیتی ئەورووپا، دەربڕی.

لای خۆیەوە باڵیۆزی یەكیتی ئەورووپا خۆشحاڵی خۆی بە دیداری سەرۆكی هەرێمی کوردستان و كاركردنی لە عێراق نیشان دا و پوختەیەكی دەربارەی پلانی داهاتووی لە عێراق و هەرێمی كوردستان خستەڕوو، بەتایبەتی لە پێشخستنی بوارەكانی ئابووری و سەقامگیری و مافەكانی مرۆڤدا.

تاوتوێكردنی دۆخی پەنابەران و میكانیزمی ڕێگریكردن لە كۆچی نایاسایی و چەند بابەتێكی جێی بایەخی هاوبەش، لایەنێكی دیكەی دیدارەكە بوو.